На младите од регионот не смее да им се подрива чуството дека се европејци исто толку колку европејците. Сите си требаме и ние на Европската Унија и таа нас, особено во времиња како овие, порача денеска министерката за култура Бисера Костадиновска-Стојчевска пред учесниците на панелот посветен на „Модалитети за унапредување на добрососедските односи и регионалната соработка“, што се одржува во Струга во рамки на Преспа форумот за дијалог (ПФД).

Северна Македонија, нагласи, прави се да биде добар сосед на Балканот и партнер во позитивните промени кои го движат Балканот и светот, што не е секогаш лесно и не е секогаш праведно. Соработката и солидарноста, според минисерката, се клучот на едно човештво и така треба да остане.

– Ги цениме сите придобивки од Берлинскиот процес за интеграција на Западен Балкан. Не радува високата поддршка што ја ужива иницијативата Отворен Балкан, особено кај младите. Но, она што мене ме загрижува е што расте евроскептицизмот, рече Костадиновска – Стојчевска.

Потсети на позитивни примери на регионална соработка, кои, според неа, не се замена за членството во ЕУ, но се добра почетна точка и пример дека навистина можеме да ги надминеме границите, особено преку културата, образованието и уметноста.

– Секој кој ќе ја потцени моќта на културата и уметноста, живее во сопствената немоќ. Губи само тој. Имаме Македонски културни центри во Тирана, Софија, Истанбул и Загреб, а наскоро и во Белград, кои се вистински репрезенти на нашата култура, ја отсликуваат нашата соработка со земјите во кои се наоѓаат. Претставуваат центар на нашите културни работници, уметници што творат и живеат таму, но и оние што сакаат да ја претстават својата култура и уметност, посочи министерката за култура.

Панелот „Модалитети за унапредување на добрососедските односи и регионалната соработка“ е фокусиран на добри практики кои постојат во Европа, а може да се применуваат во Западен Балкан. На него учествуваат млади од земјава и странство.