Собранието на Косово со мнозинство гласови денеска даде дозвола за испраќање на контингент на Безбедносните сили на Косово (ФСК) во мировна мисија на Фолкландските Острови, кои се под јурисдикција на Велика Британија.

Со гласовите на 77 пратеници во Собранието беше усвоена вчерашната владина одлуката за испраќање припадници на ФСК во мисија надвор од земјата, според Имплементирачкиот договор за приклучување на персонал на ФСК во Пешадиската единица Роулмент на Фолкландските острови.

Во мисијата, која е со цел поддршка на мирот на Фолкланд, ќе учествуваат до седуммина припадници на ФСК. Мисијата ќе трае три години, со можност за продолжување и за ротација.

Контигентот на ФСК ќе биде под команда на вооружените сили на земјата домаќин, а трошоците ќе се покријат од буџетот на Косово.

Фолкландските Острови се спорни меѓу Британија и Аргентина, а двете земји биле во војна поради нив на почетокот на 1980-тите години.