Комунални редари од скопските градски општини ќе имаат поголеми овластувања во рамките на општините – ова го предвидуваат законските измени кои се во процедура.

Градоначалникот на Општина Центар, Горан Герасимовски, вели дека со измените на Законот за локална самоуправа, кои предвидуваат вметнување на комуналните редари, ќе се дадат поголеми ингеренции на општините и ќе се врати редот и мирот во градските населби.

„Околу измените на Законот за локална самоуправа, го поздравувам делот за вметнување комунални редари – нешто за кое зборуваме со години наназад. Ние дури говоревме за комунална полиција, а сега гледаме дека ќе биде вметнато како комунални редари кои би имале поголеми ингеренции низ општините“, рече Герасимовски.

Тој додаде дека првично ова ќе биде пилот-проект на територијата на Град Скопје.

„Го поздравувам тој чекор, за да го вратиме мирот и редот. Тие ќе бидат задолжени во делот на неправилно паркирање, гласна музика, дивоградби, урбана опрема. Добро би било да имаме поголем број на комунални редари кои конечно ќе ни помогнат за да направиме ред во општините“, рече Герасимовски.