Комунална: За чистење на депонијата кај Железничка е надлежна Општината, нашите обврски се исполнети
По текстот што „Слободен печат“ го напиша ова утро во однос на новата мини-депонија која „никна“ во близина на Железничката станица – Скопје, од ЈП „Комунална хигиена“ експресно добивме одговор каде тие се сложуваат дека глетката е ужасна, но се оградуваат од одговорност за чистење на ова ѓубриште и топката ја префрлаат кај службите и инспекторите од Општина Аеродром, кои според „Комуналец“ се надлежни за постапување по овој проблем.
Препорачано
-Во контекст со написот под наслов „Нова минидепонија близу Железничка – двоседи, веце школка, искршени контејнери…“, би сакале да ве информираме дека екипите ЈП Комунална хигиена-Скопје ги празнат контејнерите поставени на јавни површини со истата динамика како во цела измината деценија, седум пати во неделата согласно Оперативниот план за собирање и транспортирање на комуналниот отпад донесен од Советот на град Скопје- велат од „Комуналец“
Тие истакнуват дека според објавените фотографии, контејнерите на посочената локација се празни, но екипите на Претпријатието немаат надлежност да го подигнат неправилно одложениот кабаст и градежен отпад, ниту пак располагаат со специјално комунално возило за таа намена и ги посочија општинските акции за подигање кабаст отпад како потврда дека тоа е обврска на локалната самоуправа.
Исто така, од ЈП „Комунална хигиена“ напоменаа дека нивното претпријатие нема ингеренции да ги санкционира луѓето кои го депонираат отпадот среде тротоар, туку и тоа е во надлежност на општинските инспектори, кои според нив воопшто не ни излегуваат на терен да направат увид низ општината.
-Исто така, би сакале да напоменеме и дека ЈП Комунална хигиена Скопје нема ингеренции да ги казнува прекршителите на Законот за јавна чистота, истото може да го прави исклучиво заедно со инспекторатот на град Скопје, бидејќи инспекторатите на општините не излегуваат на терен и не постапуваат- тврдат од претпријатието.
„Слободен печат“ веднаш испрати прашања до Општина Аеродром зошто не постапуваат во однос на ова ѓубриште за кое од „Комуналец“ тврдат дека е во нивна надлежност, но оттаму до моментот на објавување на текстот нема одговор.
