Со отпуштање на 4.000 работници, компанијата Волт Дизни ја започна втората од трите фази на отпуштање на вкупно 7.000 работници. Копретседателите на „Дизни ентертејнмент“ Алан Бергман и Дејна Волден во писмо до вработените изјавиле дека во прашање се тешки одлуки, јавува Анадолија, пренесува АлЏезира Балканс.

„Секоја одлука е донесена со внимателно размислување и правиме се што можеме за да обезбедиме овој процес да се води со почит и сочувство“, се вели во меморандумот.

Третиот бран отпуштања се очекува пред почетокот на летото. Американскиот конгломерат во февруари објави дека сака да заштеди околу 5,5 милијарди долари трошоци, поради економската неизвесност.

На 1 октомври минатата година, работната сила во компанијата броеше 220.000 работници, па укинувањето на 7.000 работни места значи намалување за околу три отсто.

Повеќе од десетина компании во САД, особено во технолошкиот сектор, отпуштаат работници бидејќи индустријата се бори со пониски приходи, пад на приходите од реклами и стравувања од рецесија.