Лидерот на екстремната десница Џорџе Симион,  обезбеди повеќе од убедлива победа во првиот круг од повторените претседателски избори во Романија. Тој освои 40,5 отсто од гласовите. Второто место го зазеде градоначалникот на Букурешт Никусор Дан со 20,89 отсто од гласовите, а трет заедничкиот кандидат на владејачката коалиција Крин Антонеску со 20,34 отсто од гласовите.

Во претходно снимениот говор, Симион, 38-годишниот лидер на Унијата за единство на Романија (АУР), рече дека Романците „воскреснале“ и дека тој има само една цел доколку биде избран: „да му го врати на романскиот народ она што му е одземено“.

За да се разбере што значи тоа, неопходно е подетално да се погледне Симион како личност и неговата речиси идолизирање на американскиот претседател Доналд Трамп и движењето „ Да ја направиме Америка повторно голема (МАГА), пишува АФП. Симион често носи црвена МАГА капа и се пофали со својата директна поврзаност со Вашингтон, пишува Индекс.хр.

Основач на неговата партијата само пред шест години

Тој ја основа партијата АУР во 2019 година. За само шест кратки години, партијата, која започна како маргинална анти-ваксер група за време на пандемијата на коронавирус, прерасна во втора по големина партија во Романија, привлекувајќи ја дијаспората и младите гласачи, капитализирајќи го народниот гнев насочен кон главните политичари.

Како конзервативен христијанин, тој го поддржа неуспешниот референдум во 2018 година за промена на Уставот на Романија за да се спречи истополовите двојки некогаш да стапат во брак. Многу политички позиции на АУР се совпаѓаат со оние на движењето МАГА на Трамп, од конзервативизам за социјалните прашања до прекинување на воената помош за Украина.

Изборните тела моментално го истражуваат финансирањето на неговата кампања откако тој пријави нула средства потрошени за онлајн промоција. Тој е, исто така, под истрага за наводно поттикнување луѓе на насилство, откако рече дека на изборните функционери треба да им се „оцрни“ затоа што му забраниле на Калин Џорџеску да се кандидира, каде подоцна се премисли и рече дека сепак не го мислел тоа.

Симион најави дека во случај на победа „една од неговите опции“ е да го назначи Џорџеску за премиер. Опишувајќи се себеси како „поумерен“ од Георгеску, додека тој сам постојано инсистираше на романскиот „суверенитет“.

Критички настроен кон Русија

Како што наведуваат медиумите 38-годишниот лидер на Унијата за единство на Романија (АУР), на неколку пати досега во јавноста повика Романија да врати делови од териториите од Молдавија и Украина, а во моментов му е забранет влез во двете земји, токму порати овие негови ставови. Додека Украина го обвинува за „систематски антиукраински активности“, Молдавија тврди дека тој ја загрозува националната безбедност.

Во меѓувреме Симион силно ја критикува Европската Унија и се закани дека ќе го прекрши секој закон од Брисел со кој не се согласува. Сепак, тој смета дека Романија треба да остане членка.

За разлика од Георгеску, Симион често ја осудуваше Русија, истовремено напаѓајќи го Брисел и свртувајќи се кон Соединетите држави.

„Ние сме секако единствените кои имаме односи со Стејт департментот и другите делови на американската влада“, рече тој.

Изборно влијание

Исходот од вториот круг од претседателските избори во Романија со нетрпение ќе се чека во европските метрополи но и во Вашингтон, Киев и Москва. Романија е важен транзитен пат за испраќање оружје во Украина. Земјата има американски ракетен штит во Девеселу и три главни воздушни бази од кои НАТО врши мисии за воздушно набљудување до границата на Украина и Молдавија и преку Црното Море.

Украина извезува 70% од своето жито по брегот на Црното Море, преку романските територијални води, кон Истанбул. Романската морнарица ги деминира тие води, а романските воздухопловни сили обучуваат украински пилоти да летаат со Ф-16. Администрацијата на Трамп ги разгледува односите со Романија. Сепак, договорот за укинување на визите ненадејно беше откажан во пресрет на изборите.

Инаку како шеф на Советот за национална безбедност, романскиот претседател може да стави вето на секоја одлука и има силно влијание врз безбедносната политика. Во интервју за Би-Би-Си, Симион јасно стави до знаење дека верува оти „Русија е најголемата опасност за Романија, Полска и балтичките земји“.

Сепак, тој е убеден дека војната во Украина „не води никаде“. Тој изјави дека се надева оти мировните преговори организирани од администрацијата на Трамп ќе резултираат со прекин на огнот и мировни преговори. Јавниот бес поради финансиската поддршка на Романија за украинските бегалци беше една од централните точки на неговата кампања.