Сајбер нападите насочени кон брендови погодни за семејства се зголемија за 38 проценти во текот на изминатата година, соопшти Касперски. Истражувањето, кое се базираше на следење на клучни зборови, откри постојан пораст на обидите за напади од вториот квартал од 2024 година до првиот квартал од оваа година. Почнувајќи од само 89.000 во вториот квартал од минатата година, бројот на напади достигна 123.000 од почетокот на оваа година, соопшти компанијата, додавајќи дека открила повеќе од 432.000 такви обиди.

– Меѓу најчесто злоупотребуваните брендови беа „Лего“, „Дизни“ и „Тока Бока“ – сите широко признати и сакани од децата и родителите. „Лего“ регистрираше најмногу напади, со повеќе од 306.000 обиди, по што следуваа „Дизни“ (62.000) и „Тока Бока“ (45.000). „Пау Патрол“ и „Пепа Пиг“ исто така беа користени како популарни мамки, но во помала мера, со 12.500 и 4.900 обиди за напад, соодветно – се наведува во извештајот- пренесува Политика.

Инаку, сајбер-криминалците ја искористуваат популарноста и емоционалната врска со овие брендови за да ги измамат корисниците да преземаат малициозни датотеки, честопати скриени зад цртани филмови или игри. Колку е попопуларен брендот, толку е попривлечен за сајбер-криминалците како мамка. Анализата на „Касперски“ покажува дека најчестите закани насочени кон децата и семејствата не се секогаш најочигледните. Во текот на извештајниот период, речиси 400.000 обиди за напад беа поврзани со таканаречени преземачи, т.е. софтвер што може да изгледа безопасен, но често се користи за тајно инсталирање на други потенцијално опасни апликации. Овој софтвер често е маскиран како игри, видеа или инсталациски датотеки поврзани со популарни брендови, што го прави особено ефикасен во измамата на корисниците.

– Повеќе од 7.800 случаи вклучуваат тројанци, кои можат да украдат чувствителни податоци, да следат активност или да им овозможат на напаѓачите далечински пристап. Тие се особено опасни кога се скриени во навидум безопасни датотеки, како што се кодови за игри или апликации создадени од фанови. Рекламниот софтвер, исто така, направил над 6.400 обиди за напад, обично појавувајќи се како впечатливи игри или видео апликации кои ги преплавуваат корисниците со несакани реклами, ги забавуваат уредите и потенцијално отвораат врата за дополнителни закани, соопшти Касперски.

Како дел од анализата, истражувачите на компанијата идентификуваа повеќе измамнички и фишинг веб-страници кои го имитираат изгледот и брендирањето на популарните семејни компании. Еден впечатлив пример беше фишинг страница дизајнирана да личи на официјалната веб-страница на паркот Токио Дизни Ресорт. Ваквите измами честопати не се разликуваат од легитимните страници на прв поглед, а единствената разлика е URL-то на страницата. Лажната страница им нудеше на корисниците можност да „купат“ билети за паркот и ги замолуваше да внесат лични информации и информации за плаќање.

Сепак, наместо да се обезбеди магичен ден во забавниот парк, жртвите можеа да останат без информациите за нивната платежна картичка, велат експертите.