За време на празниците, Скопје е опасно за лицата со посебни потреби – вели Елена Кочоска од Полио Плус во емисијата „Утрински брифинг“ на „Слободен печат“.

-Движењето во шопинг центрите и на јавните манифестации е дополнително отежнато поради големиот метеж. Свеста е подигната во последниве години, но сепак не доволно за да кажеме дека лицата со посебни потреби можат непречено да се движат- вели Кочоска.

Кочоска истакна дека мора да се направат големи промени за да се олесни движењето, тоа мора да почне од институциите, но и бизнис заедницата мора да има во предвид дека и лица со одредена попреченост се конзументи и им е потребен пристап до сите шопинг центри.

Критики кон транспортниот инспекторат упати Кочоска бидејќи, според неа, не си ја врши добро работата и не реагира кога се прават улици или згради без адекватни рампи. За да се промени општата состојба, потребно е инспекторатот да казнува и корегира во почетна фаза на градба за конечно градот да се приспособи и за лицата со попреченост.