Кражбата на капаците од шахтите и на решетките од сливниците со години наназад претставува сериозен проблем во Скопје, за кој надлежните конечно најдоа соодветно решение.

Во обид да се спречи нивната кражба од несовесни граѓани, ЈП „Водовод и канализација“ неодамна започна со реализацијата на проектот за инсталација на системи за заклучување шахти и решетки на сливници.

– Реализацијата на овој проект се однесува на инсталација на 800 системи за заклучување решетки на сливници и 800 на капаци за шахти. Нивната инсталација ќе се спроведе во текот на периодот кој следува, на целата територија на град Скопје – информираат од ова јавно претпријатие.

Токму проблемот со крадењето на капаците и на решетките трае со години и децении наназад, а многу ретко сторителите се откривани и соодветно казнувани. Со ваквите типови кражба не само што се нанесува материјална штета на јавното претпријатие, туку и се загрозува здравјето и безбедноста на пешаците, особено во доцните вечерни часови кога прегледноста е значително намалена. Честопати поради отворените дупки на коловозите исто така поради украдените капаци или решетки, неретко трпат и автомобилите, но и автобусите.

Од ЈП „Водовод и канализација“ објаснуваат дека доколку на терен по воведувањето на овој проект се намали кражбата на капаците и на решетките, ќе се набават дополнителен број системи за заклучување.

– Доколку овој пилот-проект се покаже како функционално решение на долгогодишниот проблем со кражбите, ЈП „Водовод и канализација“ ќе пристапи кон набавка на поголем број вакви системи и нивна инсталација. Кражбите на капаците на шахтите и решетките на сливници се појава со која ЈП „Водовод и канализација“ се соочува во одредени периоди, а штетите што се нанесуваат не се проблем само на претпријатието, туку и на сите граѓани на Скопје – велат од јавното претпријатие.

Како за илустрација, во текот на минатата година биле украдени 187 решетки на сливници и 163 капаци на шахти, за чија замена ЈП „Водовод и канализација“ одделило 4.963.083 денари, а од почетокот на 2022 година на две улици, Среќко Пужалка и Финска, биле отуѓени 32 решетки на сливници за чија замена биле потрошени 477.376 денари.

– Реализацијата на овој проект е само една од активностите што ЈП „Водовод и канализација“ ги презема за превенција на кражбите на капаците на шахтите и решетките на сливниците, со што се делува во насока на сопствена заштита, но и во насока на заштита на граѓаните на град Скопје и зголемување на безбедноста во сообраќајот – додаваат од ЈП „Водовод и канализација“.