Веднаш по официјалната прес конференција на која беше претставен како наследник на Брендан Роџерс, Јирген Клоп пред да го одржи првиот тренинг, ги повика сите фудбалери на првиот тим во салата за прес конференции.

Потоа побара да дојдат сите вработени во клупскиот центар Мелвуд и ги претстави на фудбалерите кои притоа аплаудираа. Бидејќи стануваше збор за поголем број на вработени, претставувањето траеше 20-тина минути, а потоа се обрати и самиот Клоп.

– Овие луѓе прават се за да ви ги олеснат работите и за вие да останете фокусирани само на натпреварите и тренинзите. Почитувајте ги колку што ме почитувате мене бидејќи тие се важни исто колку и јас – порача Клоп и ги освои срцата и на фудбалерите и на вработените во Ливерпул, а останатото е историја.

Во тој период на Ливерпул не му цветаа розите, во октомври 2015 година беа 10. на табелата со скор од осум постигнати гола на осум натпревари.

Најдобар приказ за хаотичната состојба во Ливерпул е тоа што само еднаш во последните шест сезони до 2015 година, „црвените“ беа подобропласирани од шестото место на табелата, и тоа во сезоната 2013/14 кога ја загубија титулата во мртвата трка со Манчестер сити. Пред доаѓањето на Клоп за тренер, екипата се бореше за пласман во Лигата на Европа додека Лигата на шампионите беше недостижна.

Но, по првата средба со фудбалерите и вработените, само еден човек во салата за прес конференции веруваше дека клубот ќе ја врати старата слава, дека ќе триумфира во ЛШ и ќе го донесе долгоочекуваниот трофеј за шампион во Премиер лигата. Тоа беше Јирген Клоп.

Германецот и на првото обраќање пред новинарите како тренер на Ливерпул најави такво сценарио, на сите им порача дека „тие кои се сомневаат дека мора да почнат да веруваат“, но исто така и порача дека не поседува магично стапче за да ги реши проблемите туку тоа е процес кој трае со години.

Клоп веруваше во тој процес бидејќи успеа во Германија каде ги тренираше Мајнц и Борусија Дортмунд. Со двете екипи правеше чуда во Бундеслигата, ја менуваше историјата иако и двете екипи беа далеку од врвот. Но, мисијата на Клоп беше да создава шампиони, а „почвата“ во Мајнц и посебно во Борусија Дортмунд беше идеална бидејќи станува збор за клубови со неверојатен работнички менталитет за кој нема откажување. Со Борусија успеа да му „земе“ две титули на моќниот Баерн Минхен и да игра во финалето на Лигата на шампионите каде е поразен токму од баварците.

Токму на таква „почва“ наиде и во Ливерпул и ја започна својата мисија која конечно го донесе најочекуваниот трофеј за навивачите, тој од Премиер лигата, откако минатата сезона во клупските витрини го донесе и трофејот од Лигата на шампионите.