Клиниката за пулмологија и алергологија од следната недела ќе ги пушти во функција новите амбуланти кои се сместени во монтажен објект и ќе почне да ги прима пациентите закажани во „Мој термин“. Директорот на оваа клиника, проф. д-р Дејан Докиќ, вели дека паралелно со подготовка на новите амбуланти се преземени и други мерки на клиниката за да се спречи ширење на вирусот бидејќи и тука се појавуваат пациенти кои се позитивни на ковид-19 вирусот.

Монтажните амбуланти сместени во близина на клиниката и опрема се обезбедени со донација преку Министерството за здравство, за нивното уредување и ставање во функција значителен придонес дале сите вработени на клиниката користејќи ги личните контакти и способности. Во новите амбуланти, за разлика од старите, има посебни простории за изведување на различни дијагностички процедури што создава можности за помала концентрација на пациенти на едно место и запазување на мерки и протоколи кои го спречуваат ширењето на вирусот. Проблем со постоечките амбуланти е што тие функционираат во ист простор со амбулантите на другите интерни клиники, што е ризично во услови на епидемија.

-Со спонзорство од Македонската обединета дијаспора го уредивме ентериерот во новите амбуланти, ЕВН без надоместок не поврза на електродистрибутивната мрежа, помогна и Македонски телеком, јавните претпријатија ни ја асфалтираа улицата и треба да го уредат зеленилото. Вработените исто така помогнаа да се постави систем за безбедност – вели Докиќ.

На клиниката се поставени и две врати кои се отвораат без контакт, една во делот каде се наоѓа дневната болница, а друга кај одделението кај што лежат пациентите.

-Монтирана е и термална камера која е поврзана со вратите и која ја мери телесната температура на сите кои влегуваат и излегуваат. Доколку некој има покачена температура над 37 Целзиусови степени вратата нема да се отвори за да влезе. Ова важи и за вработените кои имаат картичка за влез. Со ова се подигнува нивото на заштита од новиот вирус – објаснува Докиќ.

На клиниката е поставен и нов ламинат, а персоналот кој има познавање од донирана иверка направил и нов мебел.

– Имаме професионален однос кон пациентите и големо влијание се посветува на хигиената, се носат заштитни маски и друга заштитна опрема, сето тоа се следи на камера. Клиниката е поделена во три зони, црвена, жолта и зелена во кои пациентите се поделени во зависност од тоа колкав е ризикот за ковид. По еден пациент лежи во соба. Имаме и ув-ламби за стерилизација. Заштитна опрема е набавена за една година. Нашиот пример покажува дека се може да се постигне ако секој даде придонесе колку може и како може, бидејќи на крај се тоа заедно за клиниката значеше многу, бидејќи се промени нејзиниот изгледот и се подигна степенот за заштита од новиот вирус. Со добра организација, добра волја и сложеност направивме многу – вели Докиќ.

Во изминатиот период на клиниката биле згрижени итни пациенти кои доаѓале во многу тешка состојба со отежнато дишење и ниска сатурација на крвта, поради ХОБС и пневмонија. Тие задоволни од третманот испратиле и писмо преку кое искажуваат благодарност до клиниката.