Ќе остане ли ЗЕЛС без две свои членки откако градоначалниците на Струмица и на Карпош најавија дека ќе ја напуштат оваа институција, веројатно ќе зависи од тоа дали во наредните денови ќе успеат средбите и разговорите со претседателот на ЗЕЛС Орце Ѓорѓиевски. Простор за такво нешто остави градоначалникот Стевчо Јакимовски, додека пак првиот човек на Струмица Костадин Костадинов денеска децидно соопшти дека престанува членството на неговата општина во ЗЕЛС.

И двајцата ја лоцираат причината во проблеми со министри од централната власт и индиферентниот однос на ЗЕЛС.

Напуштањето на ЗЕЛС е во знак на револт поради индиферентниот однос кон Струмица и нејзините граѓани во периодот кога тие се соочуваат со еден од најголемите предизвици – водата за пиење, која претставува основен елемент на животот, но и поради истиот однос по одбивањето од Владата на единствениот проект од Струмица за реализација со средства од унгарскиот кредит. Општина Струмица како институција не е удостоена со ниедна писмена одлука од Владата и нејзините институции, за нив дознаваме од медиумите. Поради сето ова, го напуштаме ЗЕЛС, а членството ќе важи исклучиво за законските ингеренции на ЗЕЛС во однос на системите на општините, за сè друго сме надвор од ЗЕЛС – напиша Костадинов на Фејсбук.

Според него, досега од појавувањето на проблемот со водата, ЗЕЛС не покажал апсолутно никаков интерес, иако е сведок дека надлежните државни институции, пред сè Министерството за земјоделство, шумарство и водостопанство под чија надлежност е браната Турија од која Струмица и шест населени места се снабдуваат со вода за пиење, „не мрдна со малиот прст, напротив, преку Агенцијата за храна и ветерина со анализите и резултатите од нив, си игра мајтап со струмичани“.

Костадинов смета дека ова е еден од најголемите скандали во Европа за повреда на човековите права и уставните права и слободи.

Јас како градоначалник, Општина Струмица, менаџерскиот тим и вработените во ЈПКД „Комуналец“ ќе продолжиме со нашата упорност во докажувањето на вистината дека водата е исправна и микробиолошки и по хемиско-физичкиот состав. Срамно и жално е да се тера политика врз здравјето на граѓаните на општина Струмица, срамно е да се јадат печени костени во Ново Село, а да не се покаже никаков интерес за најголемиот предизвик со кој се соочува Струмица и нејзините граѓани – вели Костадинов.

 Јакимовски: Сериозно ќе разговараме, во спротивно ќе го напуштиме ЗЕЛС

За градоначалникот на Општина Карпош, причини за напуштање на ЗЕЛС има многу затоа што оваа институција ги премолчела сите притисоци што општината ги трпи од
од министрите од оваа Влада.

Јас сум бил градоначалник кога Љупчо Георгиевски бил премиер, а јас сум бил негова опозиција, кога бил Груевски сум бил негова опозиција, па СДСМ, јас не бев нивни. Значи ова не е прв пат да кохабитираме како претставници на институции. Ова е нешто невидено што го прават министрите на Мицкоски, дали е ова негова директива или не, не знам, но се однесуваат како кучиња одврзани – рече Јакимовски на прес-конференција.

Тој ги посочи за проблемите што ги има со неколку министри.

Министерот за транспорт и врски цело време вели јас не потпишувам планови додека сум јас министер и уште се фали дека со новиот закон му се зголемени ингеренциите и тој ги потпишувал плановите. Сега јавно го прашувам: Вие одите кон Брисел или одите кон Москва? Ако одите кон Брисел, вие дискрециони права не смеете да имате, треба да ги намалувате. Ако одите кон Москва, тогаш ќе функционирате со декрет, а очигледно дека момчето сака да функционира со декрет и тоа го прави со сериозен притисок врз локалната самоуправа. Министерката за образование, од 39 милиона намалени сме на 23 милиона и вели – ние му пуштивме пари, тој нека научи да менаџира. Јас да научам да менаџирам? Тие ги намалиле средствата за функционирање на училиштата и одозгора ме прават будала. Министерот за внатрешни работи ни пушта кривични пријави за предмет апсолутно чист, значи никакво кривично дело и мене и на колешките – посочи Јакимовски.

Според него, за 47 години од постоење на општината, првпат се случи да не се гласаат програми и буџет и тоа од оваа партија што е на власт. Притоа како што рече министерот за локална самоуправа си молчи, ЗЕЛС исто така.

Јакимовски информира дека веќе го побарал претседателот на ЗЕЛС, Орце Ѓорѓиевски, со кого договориле средба за да поразговараат за проблемите, па од таа средба ќе зависи понатамошното постапување.

Сериозно ќе разговараме, во спротивно ќе го напуштиме ЗЕЛС – дециден е Јакимовски.

Ѓорѓиевски:  Тврдам дека досега не сме биле информирани за каков било проблем од нивна страна

Ѓорѓиевски, пак, смета дека е многу несериозно што двајцата градоначалници нивните погледи кон ЗЕЛС и кон одредени централни институции ги соопштуваат едниот преку фејсбук-статус, а другиот закажувајќи прес-конференција, без притоа како претседател на ЗЕЛС да биде информиран за какви било недоразбирања или проблеми поврзани со нивното функционирање.

Одговорно тврдам дека досега не сме биле информирани за каков било проблем од нивна страна, напротив со колегата Костадинов сега кога се соочува со проблем неколкупати пробував и преку пораки и лично да го контактирам за да видиме како можеме да помогнеме и како ЗЕЛС да се вклучиме во целиот процес, но не наидов на одговор од негова страна, што ми остава сомнеж дека некој се труди да вмеша политика во целиот процес. Морам да истакнам дека како претседател на ЗЕЛС во целиот изминат период не дозволив политичка дамка да се внесе во процесот на нашето делување, затоа што ние не сме тие што продуцираме проблеми, туку решаваме проблеми и на граѓаните и на општините без оглед кој е партиципиент на централната власт – нагласи Ѓорѓиевски.

Тој апелираше до Јакимовски и Костадинов да се вразумат и сериозно да размислат за нивните потези, затоа што, како што рече, не може еден градоначалник самоиницијативно да одлучи да ги стави во заложништво сите граѓани во неговата општина повлекувајќи личен потег од политичка побуда.

Тоа се одлуки за кои треба да биде запознаен Советот и тој да учествува во донесувањето одлука за една општина да се повлече од членството во ЗЕЛС. Верувам дека разумно ќе постапат – рече Ѓорѓиевски и посочи дека ЗЕЛС не е централна власт туку медијатор помеѓу општините и централната власт.

Секоја најава за нарушување на единството на ЗЕЛС им штети и на ЗЕЛС и на сите општини, оцени министерот за локална самоуправа Златко Перински, потсетувајќи дека ова е единствената асоцијација на единиците на локалната самоуправа што има мандат да ги застапува нивните интереси пред Владата.

Добро е и во иднина да остане така. Ваквото однесување сериозно ја нарушува позицијата на ЗЕЛС, затоа што само единствен ЗЕЛС може да биде сериозен партнер на Владата во разговорите за унапредување на системот на локалната самоуправа и на развојот на општините, зад што оваа Влада застана многу отворено и јасно и преку конкретни решенија тоа веќе го потврдуваме – рече Перински.

Ваквите потези, според Перински, не се решение. Со пренасочување на вниманието и политизирање на случајот, губат сите, а најмногу граѓаните, вели Перински.

Костадинов: Тврдам дека водата во Струмица е исправна