Министерството за финансии иницираше постапка до Владата за одземање на лиценца за приредување на игри на среќа за две друштва, бидејќи не се исполнети условите од издадените лиценци, соопшти денеска министерката за финансии Гордана Димитриеска – Кочоска. Таа рече дека во интерес на постапката, засега не може да се објават имињата на друштвата за приредување игри на среќа, но посочи дека едното е формирано во 2022 година и досега нема уплатено ниту еден денар од своите обврски.

– Кај двете друштва е констатирано дека не ги почитувале законските обврски што се однесуваат на поседување на лиценца, односно не се платени давачките согласно Законот за приредување на игри на среќа и согласно Законот за данок на личен доход. Меѓу нив се посебните давачки како и данок на личен доход од исплатени добивки на игри на среќа. Министерството за финансии иницираше постапката откако од Управата за јавни приходи се доби известување за извршената надворешна контрола над овие друштва, а Министерството за финансии во неколку наврати уште минатата година имаше поднесено барање за контроли, но дури сега, кога имаме нова директорка, добивме одговор. Согласно доставената документација од УЈП, а согласно надворешната контрола е констатирано дека за едно од друштвата не се платени давачки од јули 2022 година – рече министерката за финансии и посочи дека предметот е доставен до надлежните органи кои треба да утврдат во колкав обем е оштетен буџетот.

Таа рече дека до надлежните органи е доставено барање за преиспитување на законитоста на приредување на интернет игри на среќа во делот на поседувањето на лиценците на ваквите друштва и дека ако се увидат неправилности, соодветно ќе се постапува.