Во Буџетот за Град Скопје за 2023 година, донесен синоќа од Советот предвидени се 10 милиони денари за изградба на Луна паркот, проект кој со нетрпение го очекуваат најмладите откако со години се најавува, а реално не се изгради ваква забавна содржина, на нејзината локација во Градскиот парк во Скопје.

-Луна паркот сметаме дека треба да се реализира во неговите постојни граници во Градскиот парк зошто според нас не треба да се одзема во никој случај од зеленилото во паркот кој е направен на тој простор пред многу години кога не била состојбата со населението ваква каква што е денес. Напредните земји таквите забавни паркови од таков обем ги прават на периферијата, како што ги прават и трговските центри, кои ние пак ги правиме во среде центар, па после да го закочиме сообраќајот, па да имаме загадување и од сообраќај, вели Драгана Велковска, во гостувањето во „Утрински печат“.

Според неа Градот мора да се развива одржливо, и да се влечат логични потези, зошто ако се спроведуваат контрадикторни политики не може да се очекува нешто добро да излезе од тоа.

На вчерашната седница на Советот на Град Скопје во рамки на расправата за буџетот за 2023 година беше усвоен амандман од СДСМ кој се однесува на изградба на аквариум во скопската Зоолошка градина:

-Тој е еден од анахроните предлози кои јас ги имам чуено во својот мандат бидејќи во време кога ние имаме проблеми во целиот свет со биодиверзитетот ние овде да довлечкаме тука суштества од друга хемисфера кои ги носиме во затвор, во мачилиште за живи суштества, кои чувствуваат, патат и страдаат како и човекот, и има научни докази за тоа. Овде зборуваме за 10, 20, 30 пати помали услови за живот што тие во природата ги имаат, рече Велковска.

Граѓанската иницијатива Зелен Хуман Град имаше иницијатива за да се изработи анализа со која Зоолошката градина ќе почне да се трансформира во Центар за рехабилитација и конзервација на диви автохтони видови.

-Тоа значи нашата фауна што ја има овде во Македонија ќе има простор каде да се третира, на пример повредени животни, нивно лекување, рехабилитрање ако се останати без мајка во природа, да им се помогне додека се малечки. Во суштина тоа е основата на постоењето на Зоолошката. Таа треба да го зачува биодиверзитетот, а не треба да биде циркус од средниот век, каков што е овој предлог, нагласи Велковска.

Овој дел од разговорот со Драгана Велковска од Зелен Хуман Град во студиото на Слободна ТВ го слушаше и директорот на Агенцијата за промоција и поддршка на туризмот Љупчо Јаневски која даде своја забелешка за идеите на ЗХГ за нов концепт на Зоолошката градина.

-Јас не би се согласил со тоа дека нашите Зоолошки градини се мачилишта за животните, туку тоа е една од најпосетуваните атракции во градот. Всушност резерватите се за дивите животни кои треба да ги имаме и црвените зони во Националните паркови. Јас би бил среќен за десет години да имаме 20 до 25 проценти заштитени подрачја во нашата земја. Да можеме да ги посетиме, да развиваме фотосафари, набљудување на птици, да зборуваме за промовирање на флората и фауната низ туристички пасоши и се повеќе да зборуваме и да ги едуцираме нашите млади и поколонијата што треба да заштитуваме и каде се нашите грешки и да не бидат повторени, реплицираше Љупчо Јаневски.

ВИДЕО ИНТЕРВЈУ Велковска: Државата на граѓаните треба да им обезбеди енергетска независност за да излеземе од енергетската сиромаштија