Високите температури на најсилно ги вклучија инвертерите за ладење, а со тоа во секој дом се зголемува потрошувачката на електрична енергија. Граѓаните се загрижени дали ќе им се повтори зимското сценарио кога поради нередовно читање на сметките, дел од нив влегоа во непосакувана тарифна група и платија многу повеќе отколку што реално треба. За јануари стигнаа повеќе од 500 проговори, а од Регулаторната комисија за енергетика пристигна известување дека нема да се дозволи ниту еден киловат-час да се плати повеќе отколку што е реално потрошено.

Деновиве заедно со хартиените сметки стигнува и упатство како да се прочита потрошувачката на електрична енергија и да се испрати информацијата до ЕВН. Упатство веќе долго време има и на официјалната страница на компанијата. Според Правилата за снабдување со електрична енергија, Електродистрибуција има обврска мерниот уред да го чита четири пати годишно, односно еднаш во секој квартал.

Дел од граѓаните што ги затекнавме пред наплатниот пункт на ЕВН, велат дека не користат компјутер и дека не би се снашле со отчитувањето.

– Не сакам да читам на струјомерот. Искрено, не знам ни дали добро би прочитал. А, што ако згрешам, па да си направам уште полошо. Јас сум од оние што сакаат и кога ќе платат сметка, да си имаат црно на бело. Ниту плаќам електронски сметки, ниту ќе праќам состојба. Нека дојдат и нека прочитаат! – вели нашиот соговорник.

Неговиот став го делат многумина во редот за плаќање сметки. Повозрасните се сеќаваат на некои дамнешни времиња и тврдат дека тогаш доаѓале инкасаторите и секој месец читале состојба.

Електродистрибуција, фирма-ќерка на ЕВН, на својата официјална страница вели дека отчитувањето на броилата е тема за која најмногу добиваат прашања, а нивниот одговор е дека иако немаат законска обврска да читаат секој месец, тоа го прават кај 85 отсто од потрошувачите.

– Според Правилата за снабдување, обврска на Електродистрибуција ДОOЕЛ Скопје е да ги отчитува броилата еднаш во три месеци. И покрај флексибилната законска регулатива, екипите на Електродистрибуција ДОЕЕЛ Скопје вложуваат максимални напори да вршат редовно месечно отчитување на броилата. Процентот на отчитани броила на месечно ниво се движи околу 85 проценти, а овој процент се зголемува на 95 проценти и тоа во рок од само три месеци. Во тие 15 проценти неотчитани броила на месечно ниво, влегуваат непристапни затворени мерни уреди и корисници во одделни рурални средини, кои не се пристапни во текот на целата година. Тие се отчитуваат во првата дадена можност во наредниот период веднаш по неуспешното отчитување. Годишно само околу 3 проценти од броилата остануваат неотчитани, и тоа само во случај на повеќе неуспешни обиди и целосно непристапни објекти – велат од Електродистрибуција.

Според новиот Закон за енергетика, предвидени се паметни броила, ама целиот процес треба да заврши за 10 години, така што 80 отсто да се заменат за 8 години. Но, директорот на Електродистрибуција Сашо Салтировски посочи дека промената на броилата со паметни е континуиран процес и не е нешто што почнува по донесувањето на новиот Закон за енергетика.

– Ние веќе имаме инсталирано околу 200.000 броила што се отчитуваат далечински. Тој процес е континуиран и во наредните години ќе продолжи. И сега има тендер за набавка на 150.000 паметни броила – рече на неодамнешниот брифинг со новинарите Салтировски.

Во земјава има околу 900.000 броила. „Паметни“ засега се нешто над 20 проценти.

Според пресметките во документот до кој дошла ТВ Телма, почетната инвестиција за месечно читање на броилата би била околу 10 милиони евра, а секоја наредна година за плати на новите вработени, за услуги, одржување на целата нова опрема, ќе се трошат 7 милиони евра. Треба да вработат и 350 нови луѓе, од кои најголем дел ќе бидат отчитувачи, како и да се обезбедат повеќе од 300 нови возила.

Граѓанин пријавил неточен часовник на броило

Здружението на инженери на Македонија соопшти дека наш сограѓанин побарал помош од нив бидејќи најпрво имал визуелно недостапно броило, а кога по неколку години му е овозможен визуелен пристап до струјомерот забележал дека тоа има отстапување од цели два часа во синхронизацијата со реалното време.

– Ваквото отстапување директно влијае врз пресметката на потрошувачката, особено на разликата помеѓу високата и ниската тарифа. Ако вградениот часовник е неточен, апаратите во домаќинството можат да работат во скапа тарифа и тогаш кога корисникот мисли дека е евтина и на тој начин сметките стануваат неоправдано повисоки – алармираат од Здружението.

Оттаму велат дека според новиот Закон за енергетика, член 164 став (1) точка 19, операторот ЕВН е должен да овозможи визуелен пристап до мерните уреди. За прекршување на оваа обврска, член 286 предвидува глоба од 1.000 до 3.000 евра.

– Сметаме дека е време оваа одредба да почне да се применува – посочуваат од Здружението.

Колку трошат клима-уредите?

Инвертер-климатизерите во класата 3,5 киловат во зависност од производителот и енергетската категорија трошат околу еден киловат-час електрична енергија, 5,5 киловати околу 1,5 киловат-часа, 7,5 киловати околу два киловат-часа, пишува Климатизери.мк.

Фабричките спецификации велат три и пол киловати се препорачува за околу 35 квадратни метри ако е за ладење и догревање, а ако е за греење, преку цела зима 25 квадратни метри.