Новиот парламентарен состав може да биде карактеристичен, бидејќи првпат по 33 години парламентаризам, во Собранието е можно да биде избрана пратеничка што ќе носи шамија. Гостиварката Имерлие Салиу е осма на кандидатската листа за пратеници на коалицијата „Вреди“ во Шестата изборна единица и може да биде првата пратеничка со шамија.

Салиу во разговор за „Слободен печат“ вели дека шамијата што ја ставила пред повеќе од 13 години, ќе ја носи до крајот на нејзиниот живот, без оглед на политичкиот ангажман и функцијата.
Во Собранието веќе има преведувачка што на работното место оди со шамија, но во претходните 10 собраниски мандати немало пратеничка, која како дел од своите верски убедувања носела шамија. Салиу, која на пратеничката листа на коалицијата „Вреди“, е номинирана од партијата Алтернатива, завршила јавна администрација на Универзитетот на Југоисточна Европа и е при крај со докторските студии по политички систем.

– Ако граѓаните ме изберат за пратеничка, нема да одам со мантил, бидејќи и јас се облекувам модерно како повеќето жени, но шамија ќе носам. Шамијата ја носам од лично верување и убедување, и тоа не е поврзано со мојот политички ангажман. Ако сум со шамија, не значи дека не можам да се занимавам со политика или со друга професија. Имам завршено јавна администрација на Универзитетот на Југоисточна Европа, завршив магистерски студии на Тетовскиот универзитет и при крај сум со докторските студии по политички науки. Работам во Општина Гостивар, на местото помошник раководител на Секторот за јавни дејности, во Одделението за социјални работи и заштита на деца – вели Салиу.

Таа додава дека пред да се вработи во Општината, две години била универзитетска професорка и предавала политички науки.

– Јас и во Собранието и каде и да одам, ќе бидам со шамија. Шамијата ќе биде дел од мене до крајот на мојот живот. Шамијата ја носам повеќе од 13 години, тоа е мое лично верување во Бога. Тоа е поради мојата вера и моето лично убедување, мојата приватност во практикувањето на исламската вера. Ова модерно време во кое живееме е во кулминација на остварувањето на човекови права и мислам дека во држава како нашата, тоа ќе се прифати љубезно од граѓаните од сите националности и сметам дека ова нема да биде проблем во нашето општество. Јас тоа така го гледам – вели Салиу.

Таа додава дека не припаѓа на ниту едно здружение и организација и дека шамијата не ја носи бидејќи некој така наложил или, пак, за политички бенефит на изборите, за да таргетира гласови од потрадиционалните гласачи.

Салиу во партијата Алтернатива е повеќе од 10 години, но досега не била на функција. Таа вели дека добро ја разбира политиката, а сега и ја студира што ѝ дава за право да смета дека веќе има политички багаж зад себе.

Ако стане пратеничка, таа вели дека во фокусот на нејзиниот интерес ќе ѝ биде, пред сè, борбата за правата на жените, особено на руралните жени, но и дека меѓу приоритетите ѝ е и социјалната политика во земјава. Салиу објаснува дека од искуството што го има повеќе од четири години во Одделението за социјални работи во Општина Гостивар, знае кои се реалните проблеми на граѓаните, како и социјалните политики за помош.

На македонската политичка сцена, жените Албанки се застапени како пратенички, министерки и кандидатки за претседателки на државата, но досега немало жена на политичка или државничка позиција која носела шамија.

Шамијата од неодамна е тренд кај муслиманките во македонското општество. Мерсиха Смаиловиќ, номинирана за кандидат за претседател на државата од Бошњачкиот демократски сојуз, ако собереше 10.000 граѓански потписи, можеше да биде прва кандидатка за шеф на државата која носи шамија. Шамија носи и заменичката на Народниот правобранител, Васка Бајрамовска.

Какви видови покривки носат муслиманките

Постојат различни видови покривки, како хиџаб, никаб, бурка, што ги носат жените муслиманки низ целиот свет. Се разликуваат неколку видови, односно од целосно покривање до носење само шамија преку главата.
Хиџабот е превез што жените традиционално го носат во присуство на возрасни мажи надвор од нивното потесно семејство, а служи за покривање на главата, косата и на вратот, но не и на лицето. Хиџабот е, всушност, најлиберален и се состои од марама/вел преку главата.

Никабот е превез за лицето, кој е отворен во пределот на очите, но може да се носи и со посебна мрежа за очи, во комбинација со марама.

Бурката е најзатворен од сите превези и се состои од еден дел што ги покрива и лицето и телото, често со тесна мрежа во пределот на очите.

Ал амира е дводелен превез, составен од тесна капа, најчесто изработена од памук или од полиестер, и шамија. Некои жени муслиманки носат и химар, превез со должина до половината, кој целосно ги покрива главата, вратот и рамената, но не и лицето.