На електронската адреса на Универзитетот во Подгорица попладнево пристигнала заканувачка порака. Според информациите на црногорскиот јавен сервис, откако пристигнала пораката, евакуирани се просториите на Електротехничкиот факултет во Подгорица.

„Тоа што се случи во Србија не е ништо во споредба со она што го спремам за Електротехничкиот факултет. Ќе видите денеска дека сите ме осудувавте и малтретиравте, особено професорите кои мислеа дека се „некој и нешто“. Ќе има невидена касапница на Универзитетот, само почекајте“, пишува во е-поштата што пристигна на адресата на универзитетот.

Од полициската управа соопштија дека случајот е пријавен и дека преземаат мерки и дејствија за утврдување на сите околности.

Пораката доаѓа по двете масовни убиства во Србија во изминатите два дена, во кои загинаа 17 луѓе, а околу 20 се ранети.