Кинескиот министер за надворешни работи поради здравствени причини нема да присуствува на состанокот на АСЕАН
Кинескиот министер за надворешни работи Чин Ганг нема да присуствува на дипломатскиот собир во Индонезија оваа недела поради здравствени причини, пренесува „Ројтерс“.
Препорачано
Според агенцијата, главниот кинески дипломат Ванг Ји ќе ја претставува земјата на состаноците во Џакарта наместо Чин.
Дипломатските шефови на Асоцијацијата на нациите од Југоисточна Азија (АСЕАН) и Кина ќе се состанат во четврток пред самитот на Источна Азија и Регионалниот форум на АСЕАН во петок.
57-годишниот Чин го презеде министерството за надворешни работи од Ванг во декември, а последен пат беше виден во јавноста на 25 јуни во Пекинг по состанокот на официјални лица од Шри Ланка, Русија и Виетнам.
Портпаролот на Министерството, Ванг Венбин, во петокот беше прашан за текстот на американскиот портал „Политико“ во кој се шпекулираше дека здравствените проблеми може да се причина за отсуството на Чин. Ванг рече дека „не слушнал“ за извештајот.
Чин требаше да се сретне со шефот за надворешна политика на ЕУ, Жозеп Борел, во Пекинг минатата недела, но состанокот беше одложен откако Кина ја извести ЕУ дека средбата „повеќе не е можна“, рече портпаролот на Унијата.
Ванг Ји, шефот за надворешна политика на Кинеската комунистичка партија, му поднесува извештај на Чин, кој како министер е одговорен за надворешната политика на владата.
