Севернокорејскиот лидер Ким Џонг-ун рече дека САД и другите земји кои ја поддржуваат Украина во нејзината војна против Русија го продолжуваат конфликтот, додека напорите на Вашингтон да ги вклучи Киев и Москва во преговорите се чини дека се во полн замав.

Клучниот сојузник на рускиот претседател Владимир Путин, Ким испратил повеќе од 11.000 војници за поддршка на руските сили од есента минатата година, според проценките на Украина, Јужна Кореја и западните земји.

Според Њузвик, севернокорејскиот лидер рече дека САД и другите западни земји кои ја поддржуваат Украина „намерно“ ја продолжуваат војната во Источна Европа, според зборовите објавени вчера од државните медиуми. За време на посетата на Министерството за одбрана во Пјонгјанг, Ким рече дека овие земји „имаат нереален сон за стратешки пораз на Русија“.

Иако Кремљ ја мобилизираше својата одбранбена индустрија и насочи значителен дел од државниот буџет за вооружените сили, борбите уништија илјадници руски тенкови, оклопни возила и артилериски системи. Западните експерти се прашуваат колку долго руската економија може да го одржи сегашното ниво на трошоци за одбрана.

„Нашата армија и народ секогаш ќе ја поддржуваат и охрабруваат праведната кауза на руската армија“, рече Ким.

Украина зависи од помошта од Западот, а САД го обезбедуваат најголемиот дел од таа помош со години. Претседателот Доналд Трамп се врати на власт во ноември, ветувајќи дека ќе стави крај на војната во Европа за само 24 часа.

Иако сè уште не успеал, пишува Њузвик, Трамп започнал со напорите да ги собере руските и украинските лидери на преговарачка маса. Во саботата, тој за Њујорк Пост изјави дека разговарал со Путин, откако претходно во текот на неделата рече дека наскоро може да се сретне со Зеленски.

Трамп, исто така, посочи дека неговата администрација ќе „воспостави односи со Северна Кореја, со Ким“, иако не е јасно колку Пјонгјанг е подготвен да се вклучи во нов дијалог со претседателот и неговите високи функционери.

Ким во изјавата што ја пренесе агенцијата КЦНА вчера рече: „Зад воената машина која ја поттикнува трагичната ситуација во Украина, која трае веќе три години и предизвикува сериозна загриженост кај светската јавност, стои САД – ентитет што носи фиксна етикета на уништувач на глобалниот мир и стабилност“.

Зеленски во своето вечерно обраќање во петокот рече дека севернокорејските војници се вратиле на бојното поле.

„Се случија нови напади во областите на операцијата Курск – руската војска повторно донесе севернокорејски војници“, рече Зеленски.