Севернокорејскиот лидер Ким Џонг-ун се сретна со командантите на единицата на Корејската народна армија распоредена на фронтовската линија во Курскиот регион и истакна дека „високо ја цени“ нивната улога во помагањето на руската армија во војната против Украина, објавија денес локалните медиуми.

Според KCNA, состанокот се одржал вчера, кога командантите се вратиле во земјата за првата церемонија на доделување благодарници на војниците кои служеле во странство.

Ким, како што е наведено, добил брифинг за нивните активности и ги пофалил „подвизи на борбените единици“ кои учествувале во „ослободувањето на Курскиот регион на Руската Федерација“, објави Јонхап.

Ким им пренел „воинствено охрабрување“ на командантите и рекол дека армијата „целосно ги покажала своите уникатни квалитети“, што, според него, го зајакнало угледот на „најмоќната армија во светот“.

Фотографиите објавени од KCNA покажуваат високи функционери на Генералштабот, вклучувајќи го и заменик-началникот Ри Чанг Хо, за кој се вели дека бил распореден на почетокот на војната.

Официјален претставник на Министерството за обединување на Јужна Кореја изјави дека состанокот имал за цел да го оправда испраќањето севернокорејски трупи во Русија и да го подигне моралот.

Тој додаде дека ова би можело да биде прв пат Северна Кореја официјално да додели пофалби на војници кои се бореле во странство.