Шефот на украинската дипломатија Андриј Сибиха изјави дека Русија сè уште не одговорила на конструктивните предлози за примирје што Украина ги претстави во Истанбул, како и дека Москва се ограничи на ултиматуми, па, како што наведе, неопходно е да се зголеми притисокот врз Москва во форма на санкции.

На заедничката прес-конференција со неговиот литвански колега Кестутис Будрис во Киев, Сибиха истакна дека „некои европски престолнини“ мора да разберат дека Украина нема да ја изгуби војната, а Русија нема да ја добие, како и дека украинската страна се обидува да постигне мир додека руската страна го блокира мировниот процес, објави Укринформ.

Според Сибиха, Киев затоа инсистира 18-от пакет санкции на ЕУ да биде не само силен, туку, како што рече, разорен, за да може да го уништи рускиот енергетски и банкарски сектор, како и нивната „флота во сенка“ со која се заобиколуваат санкциите.