На седницата на Советот на општина Кичево, градоначалникот Фатмир Дехари побара од советниците на ВМРО-ДПМНЕ „да го кренат својот глас“ во однос на прашањето околу пописот на населението, односно можноста иселениците да не бидат вклучени во пресметката на парите што државата им ги доделува на општините врз основа на бројот на население, пренесува ТВ21.

Кичево има 56.725 жители, од кои 39.699 се жители на градот, а 17.026 се иселени. Невклучувањето на иселениците во пресметката за државните пари, според Дехари, ќе предизвика голема загуба за општина Кичеви, бидејќи иселениците освен поврзаноста со државата, многу придонесуваат и за економијата.

„Сметам дека тоа е несериозно, дури и да е грешка, не знам чија, овие грешки мора да се поправат бидејќи се на штета на нашите граѓани, но и на нас самите што живееме овде. Со исклучување на дијаспората, општина Кичево во 2025 година ќе загуби 2.302.000 евра само од финансиски средства, дотации за општините обезбедени од Владата“, вели Дехари.

Ова беше речено на седницата на советот на општина Кичево на која се расправаше за предлог-буџетот за 2025 година, кој изнесува 19.175.350 евра и беше едногласно изгласан, со 16 гласа „за“ и ниту еден „против“. На седницата беа разгледани и шест амандмани предложени од советниците на ВМРО-ДПМНЕ, но ниту еден не беше прифатен.