Селекторот на фудбалската репрезентација на Словенија, Матјаж Кек и како и Јосип Иличиќ најавија дека ќе навиваат на Македонија на претстојното Европско првенство.
Избраниците на селекторот Ангеловски пред настапот на ЕП ќе имаат две контроли, а првата ќе се игра утре (18 часот) на Националната Арена „Тодор Проески“ и тоа против Словенија.
Според словенечкиот селектор Кек, секој кој ќе ја потцени Македонија  скапо ќе плати.

Словенија  е прва од двете контролки пред првиот настап на големата сцена, а Кек порача дека Македонија му е симпатија и смета дека „црвено-жолтите“ можат да изненадат на ЕП.
– Пред нашиот натпревар се наоѓаме во различни ситуации, Македонија ќе игра на ЕП, додека ние сме во фаза на создавање на нов тим.  Патот кој го помина Македонија до ЕП мене ми е многу драг, а тоа е доказ дека и мала земја може да има фудбалска бајка. Мора да кажам дека моите симпатии се кон Македонија, знам многу играчи и тоа е селекција на која мора да се внимава. Секој што ќе ја потцени Македонија – скапо ќе плати. Како што Германија скапо плати пред неколку месеци. Честитки за Македонија за настапот на ЕП – изјави Кек.
Слично размислува и фудбалерот на Аталанта, Јосип Иличиќ кој вели дека Македонија игра модерен фудбал.

Овој меч со Македонија за нас е голем мотив. Ова е репрезентација која игра модерно и многу добро и искрено, на Европското првенство ќе навивам за Македонија – вели Иличиќ.