Во понеделник на собраниската Комисија за избор и именување ќе се проверуваат кандидатите кои се пријавиле на конкурсите за членови на Советот на Агенцијата за аудио и аудиовизуелни медиумски услуги и на Програмскиот совет на МРТ.

Според собраниски извори на седницата само ќе се разгледаат кој од кандидатите ги исполнува условите, додека сите други активности околу изборот ќе продолжат после годишните одмори. Тогаш ќе биде организирана јавна расправа на која кандидатите ќе добијат можност да ја презентираат пред пратениците својата кандидатура.

Од новинарската фела, кандидати членови на Советот на Агенцијата за медиуми се поранешниот претседател на Здружението на новинарите на Македонија (ЗНМ), Насер Селмани, уредничката на телевизија Телма, Сања Васиќ, новинарот Љубиша Николовски, уредникот на радиоемисијата Стадион на Канал 77 радио, Стојанче Наумов – Столе, како и уредникот на Алфа ТВ Љупчо Цветановски, некогашниот директор на ТВ Канал 5+ и претседател на поранешното еснафското здружение на национални телевизии АПЕММ, Виктор Грозданов, како и сопственикот на порталот Фактор, Александар Манев. На листата се и поранешни членови на некогашната Лустрациска комисија, Шпенд Винца и Даут Даути. Актуелниот член на Советот на АМВУ, новинарот Зоран Фиданоски повторно се кандидирал, а од моменталниот состав пак се кандидирале и Лазо Петрушевски, електроинженер од Скопје и новинарот и уредник од Куманово, Селвер Ајдини. Кандидати се и медиумските експерти Климе Бабунски, Снежана Трпевска и Сефер Тахири.

За Програмскиот совет на Македонската радио-телевизија (МРТ) има 19 претенденти. Меѓу кандидатите се уредникот на порталот „Сакам да кажам“ и основач на весникот „Вест“, Горан Михајловски, новинарката Јасмина Миронски, Веле Митаноски и Бране Стефановски. Дури шестмина од актуелниот состав на советот повторно се кандидирале за членство во ова тело. Тоа се Смилка Јанеска Саркањац, Ведат Мемедали, Керим Селпин, Ристе Панов, Илир Рамадани и Гајур Рамадани.

Инаку членовите на двете тела не беа променети по доаѓањето на СДСМ на власт, бидејќи не беа исполнети законските услови за тоа. Законските измени со кои се утврди нов начин на избор на членови на Советот на Агенцијата за медиуми беа донесени во фебруари годинава, но се уште изборот не е направен иако овие промени се преставуваа како клучни за медиумските реформи во земјава.

На седницата на Комисијата за избор и именување ќе треба да се утврдат и предлози за именување на директор и на заменик на директорот на Агенцијата за заштита на правото на слободен пристап до информации од јавен карактер, утврдување предлог одлука за именување на директор на Агенцијата за квалитет во високото образование,утврдување предлог за избор на директор и на заменик директор на Дирекцијата за заштита на личните податоци, утврдување на предлог – одлука за именување на член на Државната комисија за одлучување во управна постапка и постапка од работен однос во втор степен.
Ќе се утврдува и предлог – одлука за избор на член на Советот на јавните обвинители, како и предлог – одлука за именување на членови на Управниот одбор на Агенцијата за регулирање на железничкиот сектор.

Во информацијата за закажаната седница на Комисијата за избор и именување објавена на интернет страницата на Собранието нема подетална информација за тоа кои се кандидатите за директорските функции и нивни заменици. Пратениците велат дека тоа ќе биде познато на седницата.

Комисијата ќе треба да донесе и одлуката за објавување јавен оглас за избор на членовите на Комисијата за спречување и заштита од дискриминација.