Европската комисија ја казни мултинационалната прехранбена компанија „Монделес“ со 337,5 милиони евра поради попречување на прекуграничната трговија со производи како што се бисквитите „Милка“, „Тоблероне“, „Орео“ и кафето „Јакобс“ на единствениот пазар на ЕУ- пишува „Политика.рс“. Според комисијата, оваа компанија неколку години ги спречувала трговците да купуваат и продаваат производи од „Монделес“ во други земји од ЕУ за да ги одржи повисоките цени, а со тоа да им наштети на потрошувачите. Според Комисијата, овој тип на бизнис ги спречи добавувачите целосно да го искористат единствениот пазар.

Европската комисија, како што информираат од организацијата за заштита на потрошувачите БЕУЦ, одлучила дека мерките што ги презема „Монделес“ се незаконски според правилата на ЕУ за здрава конкуренција. Овие правила забрануваат злоупотреба на доминацијата на пазарот, како и договори и практики кои влијаат на трговијата меѓу земјите членки и кои ја спречуваат, ограничуваат или нарушуваат конкуренцијата на единствениот пазар на ЕУ. Моник Гојен, генерален директор на европската организација за потрошувачи БЕУЦ, рече дека е неправедно и погрешно што потрошувачите во некои земји од ЕУ мора да плаќаат повеќе за чоколадо, бисквити и кафе отколку во други земји поради незаконското однесување на компанијата.

– Ја поздравуваме акцијата на комисијата за користење на правилата за конкуренција на ЕУ за заштита на потрошувачите со сузбивање на компаниите што им отежнуваат на продавниците и добавувачите да ги искористат предностите на единствениот пазар и пониските цени во другите земји на ЕУ. Компаниите како „Монделес“ добиваат огромни придобивки од тргувањето на единствениот пазар на ЕУ и неприфатливо е потрошувачите да не можат да ги уживаат тие поволности бидејќи компанијата создаде вештачки трговски бариери за зголемување на цените – вели Гојенова.

Да потсетиме, Европската комисија започна официјална антимонополска истрага во 2021 година со цел да процени дали компанијата ги прекршила правилата за конкуренција на пазарите на чоколадо, бисквити и кафе. Тогаш Европската комисија објави дека постои можност да се прекршени правилата и тоа на производите што граѓаните на ЕУ ги купуваат и ги користат секојдневно. Бизнисот на оваа компанија во суштина резултираше со повисоки цени за индивидуалните потрошувачи.

„Монделез“ е еден од најголемите производители на чоколадо, бисквити и кафе во Европската унија, а пазарот на овие производи секоја година вреди десетици милијарди евра.

Имено, Комисијата утврди дека оваа компанија преку договори и еднострани практики ја ограничила таканаречената паралелна трговија со своите чоколади, бисквити и кафе меѓу земјите членки на ЕУ. Трговците се обиделе да набават производи на домашниот пазар каде што цените се пониски, а потоа да ги продаваат таму каде што се поскапи.

Ограничувањата на таквата паралелна трговија може да доведат до изолација на националниот пазар, при што производителот или снабдувачот може да наплатува повисоки цени на штета на потрошувачите. Ограничувањата на паралелната трговија, исто така, може да доведат до помала разновидност на производите.

Како дел од оваа истрага, Комисијата конкретно ги истражуваше, како што објаснија, антипазарните практики на „Монделез“, вклучително и можните ограничувања на продажните области во ЕУ преку договори кои одредуваат во која земја-членка трговецот може или не може да продава производи или кои ја ограничуваат пасивната продажба. Под лупа беа и можните ограничувања на паралелната трговија преку договори кои ги зголемуваат цените или ги ограничуваат количините специјално за клиентите кои тргуваат со производи во земјите-членки.

Истражено е ограничувањето на јазиците што се користат на пакувањето, еднострано или преку договори со трговци, што создава проблеми со продажбата во одредени други земји-членки на ЕУ.