Егејските острови се променија радикално во последните 30 години – земјоделското земјиште и шумите се значително намалени за сметка на изградените површини, пишува грчки Катимерини.

Земјоделското земјиште на островите се намали за речиси 50%, а жетвата на жито и мешунки се намали за 74%, наведува медиумот во анализата. Во исто време, 13.850 хектари шуми се уништени, а островите Хиос, Тасос и Самос изгубија помеѓу 32 и 41% од нивната шумска површина.

Промените се толку сериозни што на некои помали острови, како што се Нисирос и Кимолос, примарниот сектор е речиси целосно напуштен. Наместо тоа, изградените површини на егејските острови значително се зголемија и повеќе од 8.500 хектари земјиште сега се покриени со бетон.

Шампиони на урбанизација се Миконос и Санторини, каде што изградените површини се зголемија за 341 и 310%, наведува грчкиот дневен весник.

Според медиумот, промената во голема мера се должи на туристичкиот сектор, кој сега претставува егзистенцијална закана за самиот карактер на островот.