Врховниот дипломат на Ватикан, кардиналот Пјетро Паролин, денес изјави дека Израел врши „масакр“ во Појасот Газа.

Во интервју по повод втората годишнина од нападот на Хамас врз Израел, на 7 октомври 2023 година, Паролин оцени дека нападите биле „нечовечки и неоправдани“ и го повика Хамас да ги ослободи преостанатите заложници, објави Араб Нјуз.

„Оние кои се нападнати имаат право да се бранат, но дури и легитимната одбрана мора да го почитува принципот на пропорционалност“, рече Паролин, кој е и државен секретар на Ватикан и еден од најблиските соработници на папата Лав XIV.

„Војната што ја води израелската армија за елиминирање на Хамас го игнорира фактот дека е насочена кон во голема мера беспомошно население, веќе сведено на работ на опстанок, во област каде што зградите и домовите се сведени на урнатини“, додаде тој.

Според него, меѓународната заедница се покажа како „немоќна“, додека земјите со влијание „не направија доволно за да го спречат масакрот“.

Израелската амбасада во Светата столица изјави дека интервјуто на Паролин било „секако добронамерно“, но рече дека жали што, како што е наведено, „се фокусира на критикување на Израел, додека го занемарува континуираното одбивање на Хамас да ги ослободи заложниците и да го запре насилството“.

Во објава на мрежата X, израелската амбасада изјави дека е „проблематично“ да се користи зборот „масакр“ за да се опишат и нападите на Хамас и израелскиот одговор, нагласувајќи дека „не може да има морална еквивалентност меѓу двете страни“.

Паролин заклучи дека „не е доволно да се каже дека она што се случува е неприфатливо, а потоа да се дозволи тоа да продолжи“.

Тој ги повика земјите да ја преиспитаат „легитимноста на снабдувањето со оружје што се користи против цивили“, без да именува конкретни земји.