Поголемиот дел од претседателските кандидати изразија револт што отсуствува дебата и соочување меѓу сите кандидати како што е вообичаено за да може граѓаните на едно место да ги слушнат главните поенти од нивните програми што ќе им помогне во среда на денот на гласањето да го направат својот избор. Јавно во емисија досега се соочија само претседателските кандидати Арбен Таравари од Коалицијата Вреди и Бујар Османи од Европскиот фронт.

– Немањето дебата во оваа претседателска кампања се случува за првпат и тоа е срам за македонската демократија. Тоа ќе има сериозно влијание врз излезноста затоа што практично некој се обидува кампањата и изборот на претседател да ги направи неатрактивни. Мислам дека тоа е дел од она сценарио за потоа да се бира претседател во Парламентот, односно кој е на власт тој ќе дава и претседател, односно како резултат на партиско-политичките пазарења што ќе биде крајно штетно за граѓаните на Република Македонија, зошто претседателот ќе биде една нестабилна функција кога ќе паѓа и владата ќе паѓа и претседателот на државата. Напротив, ние треба да си имаме стабилни функции, а тоа е претседателот на државата секогаш, вели кандидатот на коалицијата „Храбро за Македонија“ Стевчо Јакимовски за „Слободен печат“.

– Ние очекувавме дека ќе има некаква кулминација на она што го правите поединечно на разни места со јавно соочување и очекувавме минимум две, едно некаде на почетокот и ова на националната телевизија што би било по дефиниција. Она што лично ме иритира е што некој од фаворитите од јавна бина вели јас сум орна, орен за дебата ама нема кандидати. Да кажете дека меѓу шестмина други вие не наоѓате ниеден со кого би седнале тоа не е коректно, реагира Билјана Ванковска, кандидатка од Левица за претседател на државата.

Кандидатот за претседател од Коалицијата Вреди, Арбен Таравари сѐ уште чека потврда дали во недела ќе има дебата на националната телевизија и додава дека е извесно дека противкандидатот Бујар Османи веќе најавил дека нема да присуствува.

– Убаво би било бидејќи ние инсистиравме некако да се најдеше термин сите да бидеме заедно. Сега колку ќе бидат точно во дебатата, не знам но јас сум подготвен да ги соочиме сите наши аргументи, факти кои ги имаме во нашите програми, вели Таравари за „Слободен печат“.

Со далеку помали буџети, на претседателските кандидати од помалите партии и коалиции во опозицијата не им преостанува друго освен да се движат меѓу граѓаните, и на таков непосреден начин да ги презентираат партиските програми.

– Водиме непосредна и скромна кампања. Останатите противкандидати се во голема медиумска предност. Тие се на телевизија, на реклами, на митинзи, а ние како нов политички субјект сме меѓу граѓаните. Приемот е многу добар и тоа многу ме охрабрува како кандидат, бидејќи сметам дека нештата во државата можат суштински да се променат на овие избори и никогаш повеќе да не биде исто, вели за „Слободен печат“ кандидатот за претседател на државата Максим Димитриевски од Движењето „За наша Македонија“ (ЗНАМ).

Во текот на предизборната кампања на партиските митинзи од говорница на дебата повикуваа и актуелниот претседател и кандидат на СДСМ, Стево Пендаровски и Гордана Силјановска Давкова од ВМРО-ДПМНЕ и коалицијата, но досега не се појавија да дебатираат во телевизиско студио иако важат за фаворити на претседателските избори меѓу кои ќе се бира победник во вториот круг на изборите на 8 мај кога ќе се одржат и парламентарните избори.

Инаку, в недела на програмската шема во 20.15 часот предвидена е двочасовна ТВ дебата на националниот сервис МРТ.