Снежана Калеска Ванчева од СДСМ вечерва во „Само вистина“ на „Канал 5“ рече дека смета оти целата работа околу откривањето и изведувањето пред правдата на одговорните за трагедијата во Кочани „се разводнува и одиме во лов на вештерки“.

„Се согласувам дека со години наназад имаме проблеми со функционирањето на системот. Говорам како држава, без разлика кој бил на власт, сведоци сме како тој систем се девастираше. Во одредено време сведоци сме дека имало обиди за промени, но не биле доволно успешни.Сега кога имаме трагедија од невидени размери, она што ми пречи е дека целата оваа работа се разводнува и одиме во лов на вештерки. Една е кривично-правната одговорност и тоа треба да биде одвоено од политичката волја за ресетирање на системот кој што не се функционален, да се утврдат пропустите и кариките што го прават системот да биде коруптивен и тоа треба да се прави во континуитет“, вели поранешната пратеничка.

„Да не заборавиме дека оваа власт пред девет месеци дојде на власт со најави за борба со корупцијата и решавање на проблемите. Но, од тоа ништо не видовме. Дали требаше да ни се случи ваква трагедија за да видиме акција?, праша Калеска Ванчева.