Американската компанија за сајбер-безбедност, „КраудСтрајк“, стана познато име од погрешни причини во петокот, откако неуспешното ажурирање на софтверот предизвика „хаос“ ширум светот, а тоа може да поттикне преиспитување меѓу инвеститорите и купувачите, велат аналитичарите.

Меѓу последиците, тие посочуваат дека акциите на компанијата паднаа за повеќе од 11 отсто во петокот, откако технолошка грешка ја прекина и попречи работата во неколку индустрии во светот – од затворање јавни сервиси, стопирање летови, до неможност за емитување медиумски програми и друго, пренесува Пословни хр.

Се вели дека „КраудСтрајк“ претходно достигна пазарна капитализација од околу 83 милијарди долари и е меѓу најпопуларните даватели на сајбер-безбедност во светот, со близу 30.000 претплатници ширум светот.

Компанијата е исто така софтверска миленичка на инвеститорите поради нејзиниот раст и високите маржи, а нејзините акции се удвоија во изминатата година, пред падот во петокот. Но, аналитичарите велат дека прекинот на многу системи поради (нивната) технолошка грешка може да ги принуди и клиентите и инвеститорите да ја преиспитаат нивната зависност од компанијата, отворајќи ја вратата за потенцијалните ривали како што е Пало Алто Нетворкс, чии акции во петокот пораснаа за 1,7 отсто.