Компанијата Мета, која ги поседува Инстаграм и Фејсбук, лансира нова социјална мрежа, Тредс, која е директен конкурент на Твитер, мрежа во сопственост на милијардерот Илон Маск. Откако Мета го лансираше Тредс, милиони следбеници се приклучија на новата платформа која ветува позитивни и продуктивни разговори, што би било разлика од реториката за поделби што ја гледаме на Твитер и на другите портали.

Сепак, тоа ветување ќе биде тешко да се одржи како што расте популарноста на апликацијата – а досега, за помалку од една недела, собра повеќе од 100 милиони корисници. Листата веќе вклучува профили поврзани со ширење дезинформации, лажни вести, штетни и погрешни содржини и говор на омраза на други мрежи.

Некои од овие корисници веќе почнаа да ги тестираат границите на новата мрежа, изнесувајќи навреди кон ЛГБТ+ заедницата, како и лажни тврдења за изборите, безбедноста на вакцината против коронавирусот…

Меѓу корисничките профили на Тредс е и оној на Џек Пособиец, новинар од крајната десница што застапува антисемитски ставови и се залага за превласт на белата раса, кој веќе објави навреди на сметка на трансродовите лица, како и тврдења дека изборите во 2020 во САД биле наместени и дека сите го знаат тоа.

Еден од највлијателните корисници на социјалните мрежи кој шири лажни тврдења за вакцините против коронавирус, д-р Џозеф Меркола, исто така отвори свој профил на Тредс.  Многу медиумски куќи познати по застапувањето екстремно десничарски ставови се приклучија на апликацијата, а некои од нив веќе споделија лажна и штетна содржина. Сепак, Тредс на почетокот користеше вграден одбранбен механизам за штетна содржина, бидејќи неговите кориснички политики се исти како оние на Инстаграм.

Имено, кога луѓето кликнуваа за да следат одредени профили кои во минатото биле означени за ширење дезинформации, Тредс прикажуваше предупредување во кое ги прашуваше дали се сигурни дека сакаат да го следат тој профил.

Така, новата мрежа се вплетка во контроверзии за цензура откако ги предупреди корисниците дека Доналд Трамп помладиот може да биде извор на дезинформации. Предупредувањето набрзо беше повлечено, но не пред да предизвика лавина од коментари.

Корисниците на Тредс кои се обидоа да го следат најстариот син на 45-от претседател на САД беа пречекани со порака: „Дали сте сигурни дека сакате да го следите овој профил?“, проследена со објаснување дека профилот повеќе пати проверено објавувал лажни информации или постапувал спротивно на упатствата на Мета заедницата. Во четвртокот, Доналд Трамп помладиот на ривалската мрежа Твитер објави предупредувачко видео и го прозва шефот на Инстаграм и Фејсбук.

„Тредс не почна баш добро“, напиша Трамп Џуниор на Твитер, истакнувајќи дека новата мрежа нема да работи баш добро ако инфлуенсерите не можат да формулираат реченица.

Како одговор на твитот на Трамп, Енди Стоун, шеф за комуникации во Мета, напиша: „Ова беше грешка и не требаше да се случи. Поправено е“, на што Трамп Џуниор одговорил: „Во ред, благодарам, го ценам тоа“.

Мета му ги суспендираше Инстаграм и Фејсбук профилите на Доналд Трамп две години по немирите на 6 јануари на Капитол Хил, па скептиците не го прифатија тврдењето на Стоун дека ова била ненамерна грешка. Исто така, неколку други високопрофилирани конзервативци на социјалните мрежи рекоа дека Тредс ги цензурирал нивните објави. Така, му ветија лојалност на Твитер и на „непријателот“ на Цукерберг, Елон Маск, со експресно тврдење дека Твитер го чува речиси неограничениот говор.

„Тредс на Фејсбук веќе ги цензурира конзервативните гласови на својата платформа, прашувајќи ги корисниците дали се сигурни дека сакаат да ги следат конзервативците поради „дезинформирање“, твитна конзервативниот коментатор Дарен Грајмс. „Мораме да ја одржуваме жива сината птица на слободата. @elonmusk.”

„Замислете да го напуштите Твитер, платформата со најголема слобода на говор на интернет – управувана од еден од најголемите заговорници за слобода на говорот на нашето време – за да се префрлите на Тредс, апликација која ги цензурира конзервативците уште од првиот ден“, твитна конзервативниот коментатор Бени Џонсон.

Мета официјално го промовираше Тредс на 6 јули. Платформата моментално ги ограничува начините на кои корисникот може да открива содржини. За разлика од Твитер, корисниците на Тредс не можат да пребаруваат конкретни фрази и се принудени да го гледаат она за што се одлучиле Мета алгоритмите. Ова значи дека популарните корисници веројатно ќе бидат широко промовирани преку алгоритмот.

Тредс ќе се тргне од политиката

Директорот на Инстаграм, Адам Мосери порача дека Тредс нема да поттикнува политички теми на својата платформа, за разлика од ривалската платформа Твитер. Тој наведе дека Тредс неизбежно ќе содржи политика и „тешки вести“, но дека платформата нема да направи ништо за да ги поттикне тие теми, додавајќи дека ангажманот или приходите што таквата содржина може да ги донесе не вреди да се ризикува интегритетот на новата платформа.

„Целта на Тредс не е да го замени Твитер“, додаде Мосери.

Изборот Тредс да се тргне од вестите и политиката на својата платформа најверојатно се заснова на предизвиците и проблемите со кои се соочи Фејсбук пред да ја намали таквата содржина во 2021 година.

Студија покажа дека во 2020 година, за време на претседателските избори во САД, Фејсбук ширел лажни вести побрзо од која било друга социјална мрежа. Друга студија од 2021 година заклучи дека Фејсбук можел да спречи повеќе од 10 милијарди прегледи на популарни страници кои објавувале дезинформации на мрежата пред изборите. До почетокот на 2021 година, Фејсбук го промени својот алгоритам за да ја намали количината на политичка содржина во фидовите на корисниците. Платформата оттогаш одржува јасен контраст во однос на Твитер, кој откако Маск го купи за 44 милијарди долари, поттикнува политичка содржина.

Маск ги охрабри политичарите да се ангажираат со него на Твитер Спејс, дозволувајќи му на републиканскиот гувернер Рон ДеСантис да ја започне својата претседателска кампања користејќи ја аудио функцијата во живо. Поранешниот водител на Фокс њуз, Такер Карлсон, исто така го користи Твитер како платформа за објавување епизоди од своето независно коментаторско шоу.

Извор : Demostat