Иако живееле пред повеќе од 60 милиони години, научниците знаат што јаделе диносаурусите, како изгледале, па дури и како умреле. Меѓутоа, начинот на кој овие изумрени видови се размножувале е мистерија. Сега експертите почнуваат да ја расветлуваат оваа праисториска тема, пишува Daily Mail.

Американскиот палеонтолог Рајли Блек вели дека диносаурусите веројатно имале пениси и се пареле на сличен начин како и денешните цицачи, при што мажјакот скокал врз женката. Сепак, видовите диносауруси со големи опашки со боцки, како што е стегосаурусот, можеби морале да бидат „покреативни“ за да избегнат повреди.

„Повеќе од еден век, палеонтолозите се прашуваа како се пареле диносаурусите“, вели Блек во написот за списанието „Смитсонијан“.

Споредбите со денешните птици и крокодили упатуваат на тоа дека некои диносауруси веројатно имале пенис односно клиторис, иако цврсти докази за овие структури сè уште не се пронајдени.

Диносаурусите владееле со Земјата приближно 165 милиони години, но исчезнале пред 66 милиони години кога нашата планета била погодена од огромен астероид. Сите диносауруси, птеросаурусите, амонитите и повеќето морски рептили изумреле, додека птиците, крокодилите и желките преживеале, заедно со некои цицачи – од кои подоцна еволуирале луѓето, пишува Дејли мејл.

Деталите за размножувањето на диносаурусите останаа мистерија, главно поради тоа што репродуктивните органи не се фосилизираат. Освен тоа, никогаш не се пронајдени фосили на диносауруси во чинот на парење – но истражувачите можат да прават претпоставки.

Процесот веројатно започнувал со некаков ритуал на „додворување“, кој вклучувал гребење по земјата и координирани движења слични на танц.

Во 2016 година, палеонтолозите открија докази за „местата за парење“ на диносаурусите во денешно западно Колорадо. На таа локација се собирале крупни месојади и со нозете ја гребеле земјата – како дел од додворувањето за да привлечат партнер.

Оваа форма на „праисториска предигра“ – докажана со трагите од гребење во правливата почва – била слична на однесувањето на некои денешни птици.

Некои видови диносауруси веројатно развиле сложени рогови со различни бои и форми за да го привлечат вниманието на потенцијалните партнери. Откако диносаурусите ќе се спареле, мажјакот веројатно ќе скокнел врз женката одзади, слично на кучињата и другите цицачи денес.

„Сите диносауруси ја користеле истата основна положба за парење“, рече д-р Беверли Халстед, легендарен англиски палеонтолог кој беше еден од првите што се осврна на оваа тема.

„Скокајќи одзади, тој ги ставал своите предни екстремитети на нејзините раменици, кревајќи ја едната задна нога над нејзиниот грб и виткајќи ја својата опашката под нејзината.“

Луис Вилазон, зоолог и научен едукатор за Би-би-си, рече дека диносаурусите се пареле „слично како жирафи“.

Поради својата голема тежина, мажјакот – кој во некои случаи можел да тежи и до 80 тони – се парел и брзо се симнувал од женката.

„Самиот момент на копулација веројатно бил многу краток за да се минимизира механичкото оптоварување на двајцата партнери“, изјави Вилазон за Science Focus.

„Мажјакот можеби ја обвивал едната нога преку опашката на женката и би го користел својот релативно долг пенис што можел да се проширува за да стигне до гениталиите на женката.“

Многу големите диносауруси можеби морале да се парат во вода.

Генерално, стегосаурусите – кои имале плочи и боцки на грбот и на опашката – морале да користат најкреативни пози, вели Блек. Боцките на опашката можеле да бидат опасна пречка за стегосаурусот одозгора – освен ако и двајцата лежеле на земја и се пареле „стомак кон стомак“.

„Додворувањето и парењето на диносаурусите можеби оставиле свои траги на древните површини, покажувајќи како тие се движеле и се позиционирале едни кон други“, додаде Блек.