И кога ќе почне да се применува новиот износ на минимална плата од 18.000 денари, според претседателот на Синдикатот на работниците од управата, правосудни органи и здруженија на граѓани (УПОЗ) Трпе Деановски, најверојатно ќе има вработени во администрацијата што ќе земаат плата под минималната, како што е сега случај. Тој вели дека е неопходно да се промени и законската регулатива околу начинот на пресметка на плати и бодувањето на вработените во јавната администрација.

Во однос на тоа што Синдикатот преземал за своите членови што земаат пониска плата од сегашниот минималец од 15.194 денари, Деановски во изјава за „Слободен печат“ објаснува дека се обиделе да ја решат ситуацијата на повисоко ниво, преку надлежните министерства, но дека разрешница нема.

– Ние не поднесовме претставки до Државниот инспекторат за труд, туку реагиравме на повисоко нив, затоа што исплати под минималната плата има на сите нивоа, и во администрацијата и во локалната самоуправа. Се обративме и до Министерството за труд и за тоа разговаравме со поранешната министерка како и до Министерството за јавна администрација. Од Министерството за јавна администрација нè известија дека реагирале и дека испратиле допис до институциите дека ниедна плата не може да биде под минималната и понудиле решение како да се пресмета бодот за да се исплати соодветна плата. Но како што сме информирани, институциите не постапиле соодветно на ова нивно решение – вели Деановски.

Тој вели дека е неопходна промена на регулативата, затоа што според сегашната се направени такви програми за пресметки на плати, кои „исфрлаат“ износи под минималниот.

– Тоа е спротивно на Законот за минимална плата и секој, па и во јавната администрација, може поединечно да поднесе претставка до Државниот трудов инспекторат или до Државниот управен инспекторат. Но искуствата покажуваат дека на овој чекор никој не се одлучува од страв да не остане без работа. Можно е и Синдикатот, без откривање на неговото име, да поднесе претставка дека платата е под минималната – објаснува Деановски.

Од Управата за јавни приходи каде што мора да пристигнат пресметките за бруто-плати, велат дека „според Законот за минимална плата, надзорот над примената на Законот, во врска со пресметката и исплатата на минималната плата, е законска надлежност на Државниот инспекторат за труд, преку инспекторите за труд“.

Од Државниот инспекторат за труд сè уште го чекаме одговорот дали некој до нив поднел претставка за плата под минималната и дали тие самостојно утврдиле такви неправилности, било да е по допрен глас, или по направени контроли и што преземале.