Марулата е растение што најмногу се јаде во пролет. Ова лиснато растение има богата традиција на одгледување и консумирање на овие простори. И тоа е она позитивното, бидејќи марулата важи за исклучително здрава, која е препорачливо да се јаде во кое било време од денот, независно од тоа дали е сервирана како прилог или како додаток на одредено јадење или, пак, со одредени додатоци се јаде како главен оброк.

Кај нас се јаде претежно како салата

Зелената салата или марула е едногодишно растение и во различни земји во светот различно се приготвува и јаде. Кај нас, таа се јаде исклучиво свежа, во салати, сендвичи и со други јадења, но во Кина, на пример, марулата се јаде варена или пржена. Кај нас од растението со јаде само листот, а во Кина се користи и коренот, кој е подеднакво хранлив како и листот.

Изобилство од витамини и минерали

Во ова лиснато растение се концентрирани голем број витамини, минерали и растителни влакна. Во составот на марулата има хлорофил и витамин К. Таа е богата и со минерални соли, лутеин и со бетакаротен. Изобилува и со витамин Ц, калциум, растителни влакна, фолна киселина и железо. Марулата вклучува во својот состав и други неопходни материи за организмот, меѓу кои витамин А, Б6, ликопен и калиум.

Многубројни лековити својства

Марулата се препорачува да ја јадат луѓето од сите возрасти. Сепак, како задолжителна во исхраната треба да ја имаат луѓето со висок крвен притисок, зголемени триглицериди и маснотии, бидејќи според нутриционистите, многу помага во решавање на овие здравствени проблеми. Исто така, зелената салата се препорачува и за сите што имаат проблем со акумулирање вишок течности во организмот. Марулата е природен диуретик, кој има способност да го елиминира вишокот течности од организмот. Покрај тоа, таа ги штити срцето и крвните садови и го подобрува функционирањето на бубрезите.

Убаво измијте ја пред да ја јадете

Ова растение е познато по тоа што многу лесно ги задржува хемиските средства со кои е третирано. Токму затоа, доколку не сте сигурни дека марулата е одгледана органски, во тој случај обидете се колку што можете подобро да ги отстраните токсините од листовите. За да го направите тоа, измиените листови марула потопете ги во студена вода, во која претходно сте раствориле сода-бикарбона или јаболков оцет. Потопената марула оставете ја да отстои околу еден час, а потоа повторно измијте ја. Единствено на овој начин ќе бидете сигурни дека марулата е здрава и безбедна за јадење.

Како да ја задржите свежината на марулата

Доколку сте купиле поголемо количество марула, зачувајте ѝ ја свежината колку што е можно подолго, бидејќи така е и највкусна. На растението обезбедете му соодветна температура која би требало да биде во просек од +3 па сѐ до +10 степени и соодветно количество влага.
Затоа, ставете ја во подлабок сад и испрскајте ја со поголемо количество вода. Без да ја исцедите, ставете ја на студено и темно место, а доколку немате такво место во домот, складирајте ја во фрижидер.
Вака подготвената марула, можете да ја користите околу две недели без да ѝ овенат ливчињата.