
Кај Табановце уапсени тројца мажи кои превезувале осуммина мигранти од Египет
Од МВР информираат дека полицијата вчера во 20:00 часот уапсила тројца мажи на возраст од 26 до 31 година, затекнати како со две возила превезуваат осум мигранти од Египет.
Препорачано
„На 30.07.2025 околу 20:00 часот, полициски службеници од Полициската станица за граничен надзор Сопот при Регионалниот центар за гранични работи Север во БЈБ ги лишиле од слобода А.С.(26) од с.Студеничани, скопско, Б.Б.(26) од Радовиш и А.Ш.(31) од Радовиш.
Имено, во 19.45 часот на автопатот Куманово – Табановце, кај Костурник, полициски службеници забележале патничко возило „ауди“ со струмички регистарски ознаки, управувано од Б.Б., а сопатник бил А.Ш., и патничко возило „фолксваген пасат“ со скопски регистарски ознаки, управувано од А.С., во кои биле превезувани мигранти. Возилата не застанале на даден знак за запирање и продолжиле движење, но набргу била запрени и во нив биле пронајдени осум лица мигранти од Египет“, се вели во полициското соопштение.
Оттаму додаваат дека мигрантите биле пренесени во Транзитен центар Табановце, а потоа било утврдено дека за А.С., еден од криумчарите, има распишано три потерници, по што тој со останатите двајца биле предадени во Полициската станица Куманово за понатамошна постапка.
По целосно расчистување и документирање на случајот, ќе следи соодветна пријава, велат од МВР.