Најголем дел од земјите од Европската Унија се соочуваат со пад на производството на јаболка во последната сезона и тоа на најбараните сорти. Затоа на пазарите веќе има недостиг од овошје, а цените на мало растат. На еден од најголемите светски саеми за јаболка во Италија, производителите, извозниците и експертите неодамна зборуваа за предизвиците со кои се соочуваат производителите. Како што објави „Иструфрут“, според податоците на Светската асоцијација на производители на јаболка и круши, годинашната реколта во земјите од Европската Унија е специфична поради недостигот на јаболка на пазарите и свежо овошје и во преработка. Пад на производството во однос на 2023 година е забележан кај двете основни сорти: „гала“ и „златен делишес“ за 10, односно 11 проценти.

Во исто време, родот на „црвениот делишес“ има раст од 20 отсто од претходната година, додека приносите на новите сорти се добри, но еднакви со ланските. Заедничкиот заклучок на експертите и производителите е дека причина за севкупниот пад на родот се лошите временски услови кои го придружуваа производството на јаболка. Особено пролетниот мраз кој го зафати поголемиот дел од Европа. Според податоците од минатиот месец, годишните залихи на јаболка се пониски во многу земји – што укажува на пониски приноси – освен Италија, Шпанија и Швајцарија. Нивните резерви се зголемени во однос на претходната година. Франција имаше три отсто намалување на производството, пишува Политика.рс. Јужен Тирол, како синоним за квалитетни насади, стандардно бележи добри резултати. Доминик Возниак, претставник на јаболкопроизводителите, зборуваше за Полска, која е најголем производител во ЕУ. Предизвиците со кои се соочуваат Полјаците се слични на оние на другите. Тој потврди дека приносот е намален и препорача имплементација на стратегија за диверзификација заедно со национални промотивни кампањи за стимулирање на потрошувачката.