КАФАНЧЕ, општествено одговорен угостителски објект во центарот на Скопје
Неодамна на нашиот официјален инстаграм-профил @slobodenpecat, сосема спонтано и автентично – на ваше барање, а на наше задоволство – започнавме иницијатива за поголема видливост на традиционалните медиуми преку понуда за читање весници во македонските угостителски објекти.
Препорачано
Првиот угостителски објект кој ни се приклучи на иницијативата е популарното место за храна, вино, дружење и добра музика – „Кафанче“! Во продолжение ќе дознаете повеќе за ова прилично ново, но веќе омилено место за уживање на многу локалци и туристи.
КАФАНЧЕ – Современа македонска кафана со фантастична кујна, одлично вино, рачно одбрана музика и топла атмосфера
„Кафанче“ е општествено одговорен угостителски објект, создаден како модерен осврт на македонската кафана, во кој ќе може да вкусите сериозни, комплексни, традиционални и современи јадења, како и одлични, несекојдневни мезиња, сите парирани со квалитетни пијалаци. Во „Кафанче“ се служи месо испробано и одобрено дури и од најголемите гурмани и храна на која е посветено и вложено многу внимание, љубов и труд – нешта кои самите ќе го почувствувате при вашата посета.
Угостителскиот објект се наоѓа во Дебар Маало, но на убава и мирна локација, каде под сончеви зраци може да се ужива без бучавата од автомобилите и градскиот метеж, а покрај тоа, особено олеснително за посетителите со деца е што веднаш до „Кафанче“ има и мал парк.
Атмосферата во „Кафанче“ е погодна за кој било дел од денот. Местото има засебно мени за доручек, а од тоа што сме вкусиле досега, особено ни се допаѓа кроасанот, но и лебот од кисело тесто (во комбинација со повеќето намази, а за кој и да се одлучите, нема да погрешите; наш фаворит е хумусот).
Како главен шеф на кујната се истакнува Матеј Мишевски, кој освен одличното редовно мени, неретко подготвува и специјални јадења и тематско мени. Изминативе месеци имавме можност да вкусиме многу такви уникатни оброци. Голем интерес имаше изминатата година за одбележувањето на Октоберфест, со фантастичниот спој на различни колбаси и квалитетно пиво, а потоа и новогодишниот период со традиционалните празнични јадења, како домашно приготвена сарма, туршија и чварки.
Пролетва, особено ни се допадна посното мени на „Кафанче“ со стекот од карфиол со чимичури сос како апсолутен фаворит. Нема да го заборавиме и првомајското мени, кога шефот Матеј подготви превкусно автентично суфлаки, маринирано во „таен сос“ – уживавме во секој залак. Периодов, популарноста на стекот од карфиол, продолжува со нивната нова пролетна салата со свеж карфиол.
Всушност, спонтаноста на „Кафанче“ е и една од нивните најсилни, највкусни адути. Затоа, ви препорачуваме да го заследите нивниот инстаграм-профил, каде често изненадуваат со уникатни понуди на одлично приготвена храна согласно достапните сезонски производи со цел да се приготвува само свежа и квалитетна храна (на пример, кога ќе известат дека баш оваа недела подготвуваат некое уникатно јадење, како изминатиот месец со понудата на свински образи со одлични прилози). Некогаш популарноста на овие јадења е толку голема, што некои лимитирани оброци знаат да завршат и на главното мени.
Ги прашавме, што според „Кафанче“ треба да пробате штом појдете, па запамтете за вашата следна нарачка: Шопска на наш начин и Цвекло на друго ниво, со по една ракија за почеток. После тоа, модар домат со аиоли од пиперки и фритери од тиквичка со втората ракија, па за главно јадење – ребро, плескавица, виенска шницла и една чаша Барово (на промоција е 🥂 )
Но, освен по умешноста во подготовката на комплексните, главни јадења, „Кафанче“ е особено познато и по своите уникатни закуски – како најава за тоа што следува, но и за моментите кога не сте премногу гладни, но сакате да се дружите со блиските, со добра храна и одлични пијалаци. Особено популарна е домашната лазања од домашна паста со рагу и бешамел сос со овчи кашкавал, а наше омилено предјадење (досега) е слаткиот компир со, како што ние си го нарекуваме, „магичниот“ прилог – мора да го вкусите, зашто како и да се обидеме, таа симбиоза на вкусови мора да се доживее на лице место.
Како што погоре кажаа од „Кафанче“ во нивната препорака (дека во моментов има вино на промоција), за уживањето да биде комплетно, тука речиси секогаш може да пиете одлични пијалаци по промотивни цени, зашто освен на храната, очекувано, огромен акцент е ставен и на доброто вино. А како што и самите ние спомнавме погоре, уживавме во нивниот првомајски специјалитет суфлаки, но искуството беше комплетно откако се одлучивме за актуелната, мајска промоција на вина од Тиквеш, од колекцијата Барово. Се одлучивме за Барово Темјаника и не погрешивме. Периодов, освен Темјаника, можете да уживате и со Барово Розе и Барово Совињон блан.
Позитивната енергија е неизбежна за место како „Кафанче“, зашто симпатичноста на угостителскиот објект е токму нагласена со близината на масите во просторот, смпатичност која буквално се чувстува и физички, но и меѓу самите гости. Тука неретко може да уживате во вечерата и со квалитетна музика во живо, како на пример џез или блуз, но во многу префинета, а пријателска атмофсера. Она што нас ни остави одличен впечаток и придонесе уште повеќе да уживаме во искуството е што „Кафанче“ има своја, рачно одбрана музичка селекција на македонски евергрини која, иако е нежна и во позадина, фантастично го збогатува целото искуство и ве расположува уште на самиот почеток од посетата.
Како што велат од „Кафанче“, целта им е да има по нешто вкусно за секој, послужено со насмевка, во позитивна атмосфера и парирано со добра музика и уште подобар пијалок. Дека тоа е така, дека „Кафанче“ важи баш за такво место, сведочи популарноста што ја стекна во рок од само една година.
