Лето – омиленото годишно време ни е во мислите во текот на целата година, бидејќи ја храни нашата душа. Сонце, море, плажа, патувања, посета на магични градови, чисто задоволство…

Во оваа летна приказна не се исклучок ниту нашите јавни личности. Иако ним најчесто летниот период им е исполнет со професионални ангажмани, секако сакаат да најдат слободно време за летен одмор, да се растоварат од обврските, да побегнат од градскиот метеж и вжештените улици.

Дел од нив за „Слободен печат“ открија како го поминуваат летото, кои им се омилените места за летен одмор во Македонија и надвор од нејзините граници и која им е дестинација од соништата.

Рената Кралевска

Рената Кралевска, или попозната како Rennata, е пејачка и талентирана девојка, која пишува прекрасни текстови за себе, но и за многу имиња од нашата музичка сцена. Рената се занимава со музика долги години, но пошироката публика ја запозна во 2012 година, со песната „Time, Time“, која доживеа неверојатен успех и надвор од границите на нашата држава. По оваа песна, Рената имаше уште неколку успешни музички проекти што се најдоа на нејзиниот канал на ВЕВО и беше првата Македонка на оваа платформа.

Како ќе го поминеш летото?

– Почетокот на летото ми го одбележа неодамнешното патување во Париз, Франција. Имав можност да ги сведочам културните обележја на самиот град, музеите и делата на Моне и Реноар за кои имав голема желба да ги видам. Уживав во музиката и во изведбите на клупската џез-сцена низ улиците на Париз, како и на концертот на современиот соул-аренби звук интерпретиран од американската пејачка Сабрина Клаудио. Покрај патувањата и надградбата на музички план, грижата за себе на духовно и физичко ниво не изостанува во ниту еден момент. Иако во текот на летото отсуствуваат групните активности на практикување јога, тоа е периодот на самопреиспитување, самоанализирање и сублимирање на сите искуства со цел – како што вели мојата учителка Бети Јанковиќ – пообјективно да се прифатат сопствените слабости и да се рекомпонира перспективата на емоционалните доживувања што води кон хармонизација на когнитивниот, емоционалниот и физичкиот аспект на севкупноста на нашето битисување.

Дали имаш професионални ангажмани?

– Овие месеци сум фокусирана на подготовките за мојот дипломски концерт, на Музичката академија во Скопје, каде што летово ги завршив последните испити на катедрата за Популарни жанрови, соло пеење. Времето го поминувам во изготвување на репертоарот и во часови поминати во откривање нова музика. Покрај музичкиот дел, моите секојдневни ангажмани се насочени кон креирање решенија и контент во здравствениот и социјалниот сектор, како дел од маркетинг тимот на „Olive Jobs & Catalyst Care Group“, каде што мисијата е насочена кон една благородна општествена кауза, да се овозможи поголема инклузивност на лицата со попреченост, аутизам, и другите ранливи категории во Велика Британија.

Како го замислуваш твојот одмор од соништата?

– Штом го прочитав прашањето, првата ментална слика ме донесе до морските бранови и прегратките на природата. Исклучително многу сакам да пливам и многу долго време знам да поминам во море/езеро. Опкруженоста со вода е мојот одмор од соништата, местото што ми овозможува севкупна регенерација.

Омилено место во Македонија за бегање од секојдневието?

– Немам место за „бегање од секојдневието“, можеби затоа што не пробувам да избегам од него (се смее), но Кокино е моето магично место на кое одам кога сакам дополнителен мир. Кога и да го посетам, се чувствувам како да сум во друга димензија. Исто така, го издвојувам Охрид со сето негово духовно наследство и планинските предели како симбол на Македонија. Нашата земја изобилува со природни убавини и места, кои допрва сакам да ги посетам и да ги истражам, па имам желба да го посетам изворот на реката Бабуна, како следно на мојата листа.

Мартина Баракоска

Мартина Баракоска е една од ретките девојки што свират тапани кај нас и тоа рамо до рамо со најдобрите меѓу своите колеги. Девојка што им пркоси на стереотипите и убедливо докажува дека полот не е предуслов за да бидеш добар музичар и реализиран уметник. Во моментов е активен член на бендот „Фанк шуи“, заедно со момците од бендот настапува и ги освојува симпатиите на публиката на поголемите регионални музички фестивали. Иако професионално е прилично зафатена, сепак ужива во летото, па дури и на кратки излети со колегите од бендот на локалните плажи, каде што настапуваат во моментот.

Дали и каде на одмор летово?

– Ова лето ми е поспонтано и немам испланирано ништо конкретно освен работата (се смее), но само што се вратив од Ластово, остров во Хрватска, каде што свиревме со „Фанк шуи“. Покрај возењето од повеќе од 20 часа, успеавме да избегаме на неколку прекрасни плажи. Се важи тоа?

Дали имаш професионални ангажмани?

– Да, дефинитивно, дали е свирење или работа во студио, летово ми е константно исполнето со обврски, кои ми носат многу големо задоволство.

Како го замислуваш твојот одмор од соништата?

– Покрај вода! Сфатив дека ми се допаѓаат вистински тивки места што не се претерано туристички, туку мирни и изолирани.

Омилено место во Македонија за бегање од секојдневието?

– Охрид или кајак на Матка.