ЈП „Водовод и канализација“ нуди нова услуга т.е дигитален асистент „Ана“, кој е базиран на вештачка интелигенција кој има за цел да им помогне на граѓаните на Скопје со услугите на јавното претпријатие.
Ова е прва и единствена технолошка иновација од ваков вид во јавниот сектор на ниво на нашата државa и е воведена, како што велат од јавното претпријатие, сѐ со цел побрзо решавање на барањата на граѓаните и подобрување на корисничкото искуство.

Од ЈП „Водовод и канализација“ информираат дека целта е да им се помогне на граѓаните за брзо и ефикасно доставување барања, исполнување на нивните обврски без чекање и во секое време, зголемување на бројот на електронски корисници, а со тоа и да ги направи услугите на претпријатието полесно достапни за граѓаните како и да делува во насока на намалување на трошоците.

– Дигиталниот асистент може навремено да ве известува за планирани и непланирани прекини во водоснабдувањето во реонот во кој живеете во Скопје, може да ви помогне лесно да ги платите и да направите увид во вашите неплатени сметки, да пријавите дефекти на територијата на градот, и да поднесете корисничко барање. Корисниците исто така ќе добиваат брзи и точни одговори за прашања поврзани со услугите на Водовод, како и самата институција. Дополнително, Ана може да ви помогне да заштедите вода преку советите за штедење на вода кои ќе влијаат на вашите секојдневни навики. Со воведување на ваков вид на иновација, корисниците ќе имаат можност да добијат одговори на своите прашања и да поднесат барање без да мора да посетуваат некои од пунктовите или да се јавуваат во Контакт-центарот и на едноставен начин да пристапат до виртуелниот асистент што ќе одговори на сите нивни прашања, во секое време – објаснуваат од претпријатието.

Со Ана ќе може да „зборувате“ на официјалната веб-страница на ЈП Водовод и канализација – Скопје, мобилната апликација, достапна за Android и iOS, или преку апликациите Facebook Messenger на Facebook страната на претпријатието и Viber на следниот линк: viber://pa?chatURI=vodovod-skopje.