Јавното претпријатие „Тетово транспорт“ повеќе од две години откако е оформено опстојува со финансиска помош од општинската каса. На последната седница на Советот на Општина Тетово, се донесе одлука да се субвенциоира претпријатието со 4 милиони денари, колку што било во загуба во текот на 2022 година.

Јавното претпријатие „Тетово Транспорт“ ќе се субвенционира се додека не застане на „здрави нозе“, нема да се дозволи да згасне, оти како што рекоа од Општина Тетово, јавниот превоз е важен за граѓаните и тие треба што повеќе да го користат, за да имаме почиста животна средина.

Бесарт Дурмиши претседател на Советот на Општина Тетово, вели дека се работи на посебна план програма за финансиска стабилизација на претпријатието, која во себе содржи и точки за послободен проток на автобусите низ тетовските улици. Во меѓувреме ќе се започне кампања, за бенефитите од користењето на јавниот превоз.

„Општината го субвенционираше ЈП „Тетово Транспорт“, оти јавниот превоз работи со загуби. Тој е многу важен за граѓаните за почиста животна средина и за да им излеземе во пресрет на граѓаните и да ги мотивираме граѓаните што повеќе да го користат јавниот превоз, ние како општина и во време на поскапувања, одлучивме да не ја зголемиме цената на картата. Јавниот превоз да работи со позитивно салдо, треба една карта да изнесува 100 денари. Затоа ние одлучивме претпријатието да го субвенционираме, а не да ја зголемиме цената на картата.Ќе се воведат и други линии до Сараќино, Фалише, Бозовце и до Вешала, но сега имаме само 5 автобуси, треба уште превозни средства, за да има и до таму линии. Се работи на финансиска стабилизација на претпријатието, а ќе почнеме со кампања, за да се мотивираат граѓаните што повеќе да го користат јавниот превоз, рече Бесарт Дурмиши претседател на Советот на Општина Тетово.

Но автобусите, освен учениците ретко кој ги користи.Тетовци велат дека низ град одат или со велосипед или пеш, оти сообраќајниот хаос го попречува нормалниот проток на возила, особено на градските автобуси.

„Мора да се создаде ред во сообраќајот, па потоа да се користи јавниот превоз. Низ градот има автобуски постројки каде застануваат градските автобуси да се симнат патниците и да се качат нови, но таму има паркирани автомобили, па често се чека подолго време за да застане автобусот. Друг проблем е што нема добар проток на сообраќај, па често до некоја дестинација, побрзо би стигнале пеш, отколку со автобус“, вели една тетовка.

Десет години градските власти најавуваат ефикасен транспорт за граѓаните. Петте градски автобуси беа промовирани пред две години. За нив општината плати 720 000 евра , но наместо на коловозите, тие беа 8 месеци гаражирани, со образложени дека треба да се создадат услови, за да започнат да превезуваат патници.

Во летото 2021 години јавниот превоз стартуваше бесплатно, со неколку линии и со големи проблеми.Поради сообраќајниот хаос за поминати 5 километри, автобусот во просек возеше и до 40 минути.

Кога во есента дојде на власт новата локална самоуправа, одлучи одреден период да го стави во мирување јавниот превоз, оти како што рекоа претпријатието работеле без контрола, работниците биле без придонеси и наместо во фирмата, се воделе како дел од вработени во Општина Тетово.