Поголем дел од вработените на ЈКП Тетово за „Слободен печат’ сведочат дека не земаат редовно плата а здравствено и пензиско осигурување не им е исплатено речиси една година.

Со вакви проблеми се соочуваме повеќе години, но истите се поизразени откако ЈКП Тетово се подели на три правни субјекти ЈП „Шари“ кое стопанисува со Секторот водовод и канализација, претпријатието Саубермахер кое менаџира со сметот и нашето старо ЈКП Тетово под чија капа се градскиот пазар, градските православни гробишта и одржување на паркови и зеленило, додаваат работниците.

„ЈКП Тетово е во катастрофална состојбата, „Шари“ и „Саубермахер“ земаа колку толку плата , а ние како ЈКП Тетово не земаме редовно плата, последна плата што сме ја зеле е за месец април, три месеци немаме земено плата и немаме исплатено плата за декември минатата година, а придонеси нема 9 месеци.Кај нас имаме 280 вработени, кај Саубермахер има 70, а кај Шари има 100 вработени, сведочат вработените на ЈКП Тетово.

Сметаат дека од сметката за комуналните услуги за нивното претпријатие треба да се одвојува поголема сума.

„Со поделбата ЈКП Тетово ја направија загубар и многу тешко може да се оствари приход за да земат плата вработените, сметката е поделена за три субјекти и за нас има само 105 денари од целата сметка за сите комунални услуги. Ние бараме повисока сума за нас во сметката, за да имаме редовни плати треба да се стави и делот за одржување на зеленило, за да можеме да работиме рентабилно. Проблем е што исто така не се регулирани сметките оти хаос е со нив и затоа граѓаните не плаќаат и немаме приходи и не работиме рентабилно“, велат вработените на ЈКП Тетово.

Директорот на ЈКП Тетово Самет Бислими во разговор за „Слободен печат“ рече дека неодамна кога бил поставен за прв човек на ЈКП Тетово претпријатието го затекнал со 4 заостанати плати, но сега како што кажа доцнат само 3, а се надева дека до крајот на оваа година ќе бидат без долгови кон вработените.

Во меѓувреме проблемите со комуналните сметки продолжуваат. Граѓаните велат дека ги добиваат без никаква реална методологија за наплата со многу поголема сума од претходно.

Вака е повеќе од 6 месеци откако словенечката компанија Саубермахер започна да го менаџира сметот во Тетово, но и да ги фактурира сите комунални сметки.

Со месеци се фактурираа сметки за починати лица, гаражи и подруми, а тетовци се жалат дека им доаѓаат сметки за иста катастарска парцела односно стан или куќа, но со различен сериски број на фактура, па дури и како што велат, сумата за плаќање не е иста.

Свеченост на тетовскиот плоштад со нови контејнери и камони, Словенците го презедоа менаџирањето со сметот