Градски двокатни ЈСП автобуси на рекорд / Фото: ''Слободен печат'' - Драган Митрески

Јавниот превоз на „стаклени“ тркала, шофери заминуваат од ЈСП, нови тешко се наоѓаат

Десетици возачи си заминуваат од ЈСП и од октомври ќе се вклучат во јавниот превоз во некој од германските градови. Во медиумите циркулира бројка од 60 до стотина луѓе, иако за нивниот точен број нема потврда од јавното сообраќајно претпријатие.

Во изминативе години ЈСП се соочува со многу проблеми, а еден од нив е и намалување на бројот на возачи поради пензионирање и заминување на работа во странство, но голем проблем се и ниските плати и нивната нередовна исплата. Поради тоа, минатата година за првпат градот неколку дена остана без јавен превоз, а минатиот месец платите беа исплатени во последен миг за да се спречи повторно штрајк на вработените во ова претпријатие.

Веќе е познато дека шофери на автобуси со години заминуваат од ЈСП во потрага по подобри услови за работа и живот надвор од Македонија. Сега е актуелна Германија, пред неколку години беше Малта, каде што исто заминаа триесетина возачи кога во оваа држава имаше потреба од таков кадар. Но, најголем проблем е што тешко се наоѓаат нови возачи.

Во државава не се „произведуваат“ возачи иако има потреба од нив. Доаѓаат да управуваат со автобусите луѓе на 40 и 50-годишна возраст, но некои од нив не можат да ги издржат постојните услови и си заминуваат – објасни неодамна Миќо Стојановски, претседател на синдикатот во ЈСП за „Слободен печат“.

За тоа дали најновиот одлив на возачи од претпријатието ќе се одрази на нормалното функционирање на јавниот превоз во Скопје, Стојановски вели дека со внатрешна реорганизација се прави напор да се надоместат оние што заминуваат.

 Одлив имало и ќе има. Секој си бара подобра егзистенција. Одливот на возачи од ЈСП не е од сега, трае со години. Прво почнаа да си заминуваат оние што разни гарнитури ги примаа партиски. Недостигот на кадар се пополнува од внатрешни резерви, се прераспоредуваат оние што поседуваат Д- дозвола, а сега има и отворен конкурс на кој се бараат возачи. Очекувам оние што ќе се пријават да бидат повозрасни луѓе затоа што младите си бегаат од државата. Помина времето кога на конкурс за шофери во ЈСП се пријавуваа по 300 кандидати за 20 места, сега ќе видиме колку ќе се пријават – вели Стојановски.

Тој тврди дека состојбата не е критична за да не може нормално да се одвива јавниот превоз.

Новите возачи што се примаат на работа во претпријатието, најпрво се примаат со договори преку Агенцијата за времени вработувања, а подоцна овие договори се трансформираат во редовни вработувања. Проблем се и релативно ниските плати на возачите.

Со директорот Крсте Петревски се договоривме да нема повеќе возачи почетници, такви моментално има неколкумина, затоа што за 24-25 илјади колку што се дава на почетниците веќе никој не работи, а не пак возач во јавен превоз – објаснува првиот синдикалец во ЈСП.

Возачите што заминуваат, освен на платите се жалат и на лошите услови за работа особено поради тоа што, како што тврдат мораат да возат повеќе часови од она што е одредено со правилникот за работа.

Стојановски објаснува дека во зависност од тоа дали работат трисменски или во две смени обврска е да возат шест, односно седум часа. Оние што возат шест преку викенд надополнуваат. Но, како што вели, напорно е да се вози 7 часа низ градот. Возачите, како и сите други имаат половина час пауза, но ретко кој од нив го користи за да не го наруши возниот ред.

Од ЈСП „Скопје“ деновиве не излегоа во јавноста со објаснување за состојбата во претпријатието поради заминувањето на возачите. Единствено демантираа некои од пишувањата во медиумите со обвинувања за тенденциозни намери и исполнување политички агенди и со став дека новинарите не сакаат да се информираат за реалната состојба на претпријатието.

Напротив, „Слободен печат“ како и многупати досега сакаше да го слушне ставот на ЈСП. Но прашањата за тоа со колку возачи моментално располага ЈСП и колкава е нивната основна плата, колку возачи побаруваат на јавниот оглас што неодамна беше распишан и дали возачите со кои располагаат се доволни за нормално и безбедно функционирање на јавниот превоз – веќе вообичаено останаа без одговор. Без одговор остана и прашањето поврзано со тврдењата на ЈСП дека менаџментот почнал да го консолидира претпријатието – дали тоа значи дека плати навреме се исплаќаат, дека претпријатието не работи повеќе со загуби, дека располага со квалитетен возен парк и доволно кадар? Одговор нема.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот