Јапонија го загуби статусот на најголем кредитор во светот за прв пат по 34 години, а на негово место дојде Германија. Нето вредноста на странските средства што ги поседуваат јапонските компании, домаќинствата и владата се зголеми за 13 проценти во 2024 година на 533,05 трилиони јени, според јапонското Министерство за финансии. Ова е рекордна бројка за Јапонија, но овој пат заостанува зад Германија, која има странски средства во вредност од 3,49 трилиони евра.

Кина е сè уште на третата позиција, со странски средства проценети на 3,16 трилиони евра, објави „Блумберг“. Растот на обемот на странски средства во Германија овозможи значителен суфицит на тековната сметка, кој достигна 248,7 милијарди евра минатата година. Во Јапонија, оваа бројка изнесуваше 29,4 трилиони јени, или 180 милијарди евра. Во меѓувреме, девизниот курс на еврото во однос на јенот се зголеми за околу еден процент во последната година.

Јапонскиот министер за финансии Кацунобу Като изјави дека губењето на статусот на Јапонија како најголема земја-кредитор во светот не е причина за загриженост и во обраќањето пред новинарите истакна дека нето девизните средства на Јапонија постојано се зголемуваат.