Извозот на хемикалии од ЕУ достигна рекордни 560 милијарди евра
Вредноста на извозот на хемикалии и сродни производи од Европската Унија достигна рекордни 560 милијарди евра минатата година, што е зголемување од седум проценти во однос на истиот период од претходната година, објави денес Евростат- пренесе Политика.
Препорачано
Спротивно на тоа, вредноста на европскиот увоз на хемикалии од земји надвор од Европската Унија се намали за еден процент во однос на истиот период од претходната година, на 322 милијарди евра во истиот период. Најголемите извозници на хемикалии во земји надвор од ЕУ беа Германија, со извоз во вредност од 134 милијарди евра, Ирска 82 милијарди евра, Белгија 62 милијарди евра, Франција 54 милијарди евра и Холандија 50 милијарди евра.
Главните пазари за овие производи беа Соединетите Американски Држави, каде што стока од ЕУ беше извезена за 170 милијарди евра, по што следуваа Швајцарија 64 милијарди евра, Обединетото Кралство 47 милијарди евра, Кина 36 милијарди евра и Јапонија 18 милијарди евра.
Кога станува збор за увоз, Германија беше предводник со хемикалии во вредност од 56 милијарди евра купени од земји надвор од Европската Унија, пред Белгија 45 милијарди евра, Холандија 43 милијарди евра, Италија 34 милијарди евра и Словенија 29 милијарди евра, според веб-страницата на Евростат.
