Израелскиот претседател Исак Херцог ја поздрави одлуката на американскиот претседател Доналд Трамп да ги нападне нуклеарните објекти на Иран, велејќи дека „историската одлука“ би можела „јасно да го промени текот на Блискиот Исток кон многу подобра иднина“.

Во разговор за Си-Ен-Ен, Херцог не кажа дека нуклеарната програма на Иран е целосно уништена, но рече дека е „многу лошо погодена“ од израелските и американските напади, објави „Тајмс оф Израел“.

Херцог повтори дека промената на режимот „воопшто не е официјална цел на оваа војна“, но дека тоа би бил „многу добредојден несакан ефект“. Тој изрази надеж дека американскиот напад ќе создаде можност за мир во регионот, вклучително и меѓу Израел и Палестинците.

Трамп рано утрово објави дека САД погодиле три објекти за збогатување ураниум во Иран преку ноќ и дека сите три објекти се целосно уништени.