Прекуграничната размена на оган меѓу Израел и Хезболах продолжи и денеска, при што загина еден припадник на либанската организација, соопштија двете страни.

Израелските одбранбени сили (ИДФ) соопштија дека ја напаѓаат „терористичката инфраструктура на Хезболах на либанска територија, од авиони, со минофрлачки и артилериски оган“.

Либанската Национална новинска агенција (ННА) објави дека израелските сили го гаѓале Хамул, источно од Накура со гранати и воздушни напади.

ИДФ потврдија дека неколку контролни пунктови во близина на границата биле погодени од нападот од Либан. Како што се наведува, ИДФ одговорила со напади врз изворот на нападите.

Пограничните конфликти меѓу Израел и Хезболах се интензивираа по нападот на палестински Хамас на југот на Израел на 7 октомври.

За време на еднонеделното примирје во војната во Појасот Газа беа прекинати и конфликтите на северот на Израел на границата со Либан.