Поранешниот претседател на Бразил, левичарот Луис Игнасио Лула да Силва, освои 51 отсто од гласовите, а актуелниот шеф на државата, десничарот Жаир Болсонаро, 37 отсто, објави Врховниот изборен суд на Бразил, највисокото изборно тело во Бразил, врз основа на само 0,1 отсто од преброените гласови по денешните општи избори.

Доколку ниту еден од кандидатите не освои повеќе од 50 отсто од гласовите, двајцата кандидати со најмногу гласови ќе учествуваат во вториот круг на гласање на 30 октомври, пренесува Ројтерс.

Повеќе од 150 милиони бразилски граѓани денеска излегоа на гласање за да изберат нов претседател, сенатори, советници и гувернери на државите.

Фокусот е на претседателските избори, а според анкетите на јавното мислење се очекува убедлива победа на Да Силва.

Како што се наведува во истражувањето, тој треба да освои 48,3 отсто од гласовите, а Болсонаро 36,3 отсто.

Болсонаро гласаше во Рио де Жанеиро и рече дека очекува да победи на изборите во првиот круг, и покрај тоа што анкетите му даваат мали шанси.

На претседателските избори учествуваа 11 кандидати.

Бразилските граѓани ги избраа и сите 513 членови на Долниот дом на Конгресот, една третина од 81 член на Сенатот, гувернерите на државите и советниците.

Иако Лула да Силва ја води претседателската трка, се очекува конзервативната коалиција што го поддржува Болсонаро да има мнозинство во двата дома на Конгресот.