За половина милион жители на Скопје, службата за итна медицинска помош со домашно лекување има само 12 возила за итни интервенци и 7 возила за медицински транспорт. Минатата недела во сообраќајна несреќа се преврте едно возило за итна помош кое транспортираше пациент од Куманово на скопски Клинички центар и тоа ја остави кумановската општа болница без возила за транспорт на тешките пациенти. Потоа во текот на денот болницата позајми возило за итна помош од Здравствен дом Скопје и така се „закрпи“ проблемот дента, додека од поправка да се вратат другите две возила. Ова ја отвори пандорината кутија за долгите години невложување и негрижа за итната помош која кубури и со лекари и со возила, а за сето тоа цехот го плаќаат пациентите. Оттаму велат дека постојано бараат нови вработувања на медицински кадар и се надеваат дека во најскоро време ќе им се реализираат барањата. Неофицијално, ќе се вработат уште 22 доктори.

Службата за итна медицинска помош во Скопје има 66 лекари кои се вклучени во интервенции на терен и во диспечерскиот центар. Во ноќните дежурни служби има 21 лекар и во единицата за домашно лекување има 10 лекари. Дека бројката е мала покажува и фактот што во просек дневно во итна помош Скопје има дури 200 повици. Во дневната смена од 7 до 19 часот има само 7 до 8 медицински екипи а во ноќната смена од 19 часот до 7 наутро 6 до 7 екипи.

– Во просек имаме околу 200 повици во текот на 24 часа, околу 80 до 120 се пациенти кои бараат интервенција од страна на нашите екипи додека некои од нив се само за медицински совет и консултација. Врз основа на добиените одговори на прашањата кои ги поставува докторот на телефон секоја состојба која не е акутно животозагрозувачка може да се прими како одложена покана или да се даде совет да се јави пациентот кај својот матичен лекар, неговата замена или во седумте дежурни служби по поликлиниките при Здравствен дом на Скопје кои се дел од оваа служба, велат од Здравствен дом Скопје за „Слободен печат“.

Пациентите генерално сметаат дека во Скопје и во градовите од внатрешноста нема доволен број ни на возила ни на лекарски екипи и дека е тешко итната помош воопшто да дојде на домашната адреса. Затоа од Здравствен дом Скопје го побаравме протоколот за работа на службата за итна помош, кој објаснува според кои критериуми итната помош доаѓа на адресата од каде доаѓа повикот. Но протоколот не го добивме.

„Пристигнувањето на екипите на местото на интервенција не секогаш зависи од бројот на екипите туку и од сообраќајот и од задржувањето на медицинската екипа при предавањето на пациентите во секундарно и терцијарно ниво на здравствена заштита, рекоа од Здравствен дом Скопје.

Итната помош не може да ги ограничи граѓаните да се јавуваат на линијата 194 или на 112 и доколку е потребен само совет, но сепак апелираат пациентите да имаат трпение и да одговараат на прашањата кои ги поставува докторот на телефон за да може да се направи соодветна процена за кој степен на итност се работи.