Претставници на 32 земји од НАТО ќе се сретнат утре наутро во Брисел, на барање на Естонија по руското навлегување во воздушниот простор на таа балтичка земја, објави денес функционер на Алијансата.

Состанокот на Северноатлантскиот совет на ниво на амбасадори ќе се одржи во рамките на член 4 од договорот за НАТО, кој предвидува консултации меѓу сојузниците во случај на закани против една од нејзините членки.

Во петокот, три руски борбени авиони влегоа во естонскиот воздушен простор и останаа таму 12 минути, предизвикувајќи протести од НАТО и Европската Унија поради, како што наведоа, нови руски „провокации“, додека Москва негираше какви било повреди на воздушниот простор.

Советот за безбедност на ОН денес ќе одржи итен состанок како одговор на очигледното кршење на естонскиот воздушен простор од страна на Русија, објави естонското Министерство за надворешни работи во петокот.

Упадот се случи откако Полска, исто така членка на НАТО, на почетокот на септември објави дека руски беспилотни летала постојано го нарушувале нејзиниот воздушен простор за време на нападот врз Украина, што Варшава го осуди како „агресија“.