Групата Исламска држава соопшти дека ја презела одговорноста за два напада во јужна Сирија, вклучувајќи еден врз владините сили, што е прв напад на екстремистите врз сириската армија по падот на сирискиот претседател Башар ал-Асад во декември минатата година.

Во две одделни изјави, Исламската држава изјави дека во првиот напад на 22 мај во јужната сириска покраина Сувајда, во областа Ал Сафа, била детонирана бомба насочена кон „возило на отпадничкиот режим“, во кое биле убиени или ранети седум војници, објави денес АП.

Исламска држава соопшти дека вториот напад оваа недела во блиската област бил насочен кон припадници на Слободната сириска армија поддржана од САД, тврдејќи дека еден борец е убиен, а тројца се ранети.